Europar parlamentuak CETA Merkataritza Hitzarmena onartu du

2017/02/15
Europar Parlamentuko osoko bilkurak “Comprehensive Economic and Trade Agreement” (CETA, Merkataritza eta Ekonomia Itun Orokorra) onartu du, PNV, PP, PSE-PSOE eta Ciudadanosen aldeko botoaz. Hain zuzen, 408 baiezko, 254 ezezko eta 33 abstentzio izan dira. Honek esan nahi du behin-behinean CETA bi hilabete barru indarrean sartuko dela. Baina ondoren EBko 28 estatuetan berretsi behar da, kasu bakoitzean ezarritako formularen arabera.

Beraz, CETAren aurkako borroka ez da amaitu Europarlamentuko erabakiarekin; mobilizazioari eutsi behar diogu geldiaraziko badugu; horregatik kaleratu ginen atzo Hego Euskal Herriko lau hiriburuetan.

Tinko eutsi behar diogu; Itun honek neoliberalismo basatiari bide ematen dio, eta ondorio larriak izango ditu gure bizitzaren arlo guztietan: kontsumitzeko, ekoizteko, jateko, lan egiteko, naturarekin harremanetan jartzeko modua… Hauek dira itun arriskutsu honek izango dituen ondorio larrietako batzuk:

Inbertsio-Auzitegien Sistema (ICS): Sistema bidegabe eta paralelo hau ez da beharrezkoa, eta atzerriko korporazioei eskubidea ematen die estatuen kontra arbitraje-auzitegietan jotzeko, estatuek beren balizko etekin ekonomikoen aurka joan litekeen lege bat ezartzen dutenero.

Ardura Printzipioa, indargabetua: Europaren babes sistema zorrotzagoa da Kanadakoa edo AEBtakoa baino, produkzio-katearen fase guztiak hartzen baititu aintzat. Itun hau onartuta gure babes maila haiena bezain eskasa izango da.

Araugintzan konbergentzia beheranzkoa da: Inbertsioen eta merkataritzaren berme juridikoa lortzeko bidea da sinatu duten herrialdeen legedia harmonizatzea; horretarako negoziazio egitura berriak ezartzen dira, herritarren kontroletik kanpo eta erabat opakuak direlarik. Konbergentzia hori edonola ere beheranzkoa da gizarte-, ingurumen- eta lan-babesari dagokionez, eta pribatizaziora jotzen du sektore eta enpresa publikoetan.

Aintzat hartu beharreko beste puntu bat da CETAk zerbitzu publikoen pribatizazioa erraztuko duela. Lehenengoz Standstill klausula sartu da: Estatuek zerbitzuen “zerrenda negatiboa” egin behar dute. Horiek ez beste guztiak pribatizatu ahal litezke eta atzerriko enpresa handien lehiarako irekita geratu.