Eusko Jaurlaritzak bere langileen erretiro partziala eta txanda-kontratua modu anti-demokratikoan adostu du

2021/02/12
ELAk salatu du Eusko Jaurlaritzak, esparru politikoan defendatzen dituen arau demokratikoak errespetatu gabe, gutxiengoan sinatu dituela gaur UGT eta CCOOrekin erretiro partzialerako akordioa eta Euskal Funtzio Publikoaren Mahai Orokorraren eraginpeko langileentzako txanda-kontratua. Gobernuaren lerratze antidemokratikoarekin batera ELAk bi sindikatu horien jokabidea salatu du, euren sinadurarekin -derrigorrezkoa ez izan arren- Rajoyren pentsio-erreforma babesten dute. Are gehiago zailtzen dira erretiro partziala hartzeko baldintzak – adina eta kotyizatutako urte gehiago-. Langile finkoak soilik izango dute eskubide hau, eta errelebistak behin-begineko kontratua izango du. Beraz proposamen honek are gehiago handitzen du esparru honetan onartezinak den behin behinekotasuna. Beraz aukerarik gabe utzi dituzte aldi baterako dozenaka langile, jubilatzeko eskakizun guztiak beteagatik ere. Gainera ez da formularik aurkeztu funtzionarioen erretiro aurreratua ahalbideratzeko. Eta jubilazio primen murrizketa mantentzen du.

ELAren proposamena

Mahai orokorreko bileretan ELAk aldarrikatu zuen berton bizi garenon pentsioak gure herrian erabakitzeko eskubidea, eta euskal administrazioan errelebo-kontratua zein erretiro partziala aplikatzeko proposamena egin zuen:

  • Euskal sektore publikoko langile guztiek izatea errelebo kontraturako edo erretiro partzialerako eskubidea (baita sozietate publikoetan ere), baldintzak betetzen badituzte eta hala nahi izanez gero.

    • Aurrekontuetan horretarako diru partida “egoteak edo ez” ezin dezake hori baldintzatu.

    • Ildo beretik, ezin da langile finkoentzat bakarrik izan.

  • Erreleboa hartzen duenak lanaldi osoko kontratua izatea eta lanpostu hori ez ezabatzea inondik inora.

  • Erretiro partziala hartzen duen pertsonaren laneko denbora efektiboa murrizteko neurri guztiak ikertzea (baimen ordainduak, erretiro-primak...)

  • Eusko Jaurlaritzako funtzionario eta langile estatutarioek erretiratzeko adina aurreratzeko tresna eta formulak izatea, beti ere, lanpostuak suntsitu gabe.

Haatik, Eusko Jaurlaritzak uko egin zion ELAren proposamenari, indarrean dagoen legediak horren baitan akordioa iristeko aukera ematen duen arren; izan ere, hala gertatu da EAEko beste zenbait erakundetan.