Gaur onartutako Lan Erreformari ezezkoa ematea da negoziaketarako berme nagusia

2021/12/28
Espainiako Gobernuak gaur CEOE, UGT eta CCOOrekin adostutako lan erreforma Dekretu bidez onartu du. Dekretu bitartez onartzea iruzur demokratikoa da, Kongresuan beste alderdi politikoei presioa eragitea eta eztabaida mugatzea beste helbururik ez duena. Gobernuak azken urtean uko egin dio sindikalki nazioanistasuna onartzeari eta uko egin dio lan erreformaren indargabetzearekin ados egon daitezkeen eragileekin eta alderdiekin lan egiteari, horregatik ez da bildu ELA, CIG eta Kataluniako Intersindikalarekin hala eskatu zaionean. CEOEren beto eskubidea onartzeak hori suposatu du, eta hori aldatu ezean hurrengo urteetan langileen aldeko aldaketa estrukturalak gauzatzea ez da posible izango.

Lan Erreformaren aldaketa zehatzak aztertu ondoren aurreko astean egindako irakurketa are gordinagoa da. Behin-behinekotasunean hobekuntza txiki batzuk onartzearen truke aurreko legediaren oinarriak onartu dira, kaleratze erraz eta merkeak, enpresek aldebakarrez lan-baldintzak aldatzeko aukera eta estatuko hitzarmenek bestelako negoziaketak debekatzeko aukera hain zuzen.

Era beraen, ELA harrituta dago CONFEBASKek izandako jarrerarekin. 2017an eragile aktiboa izan zen EAEn hemengo hitzarmenen lehentasunaren aldeko Lanbidearteko Akordioa adosterakoan, oraingoan, berriz, ez du txintik esan CEOE barnean gure erabaki esparruaren defentsan. Lau patronalek egin diote aurre CEOEren zuzendaritzari lan erreforma honetan, CONFEBASK ez da horietako bat izan, eta garrantzi gehiago eman dio CEOEren barne-adostasunari beren aurreko jarrerekin koherente izateari baino.

ELAren ustez Dekretu honi Kongresuan ezezkoa ematea eta negoziaketak CEOEren eraginik gabe hastea da sakoneko aldaketak egiteko berme nagusia. Ezin da kaleratzeen araudia aldatzen ez duen edo Estatuko hitzarmenen inposaketa onartzen duen lan erreformarik izan.