Gipuzkoako Esku-hartze Sozialeko langileen elkarretaratzeak, hitzarmenaren defentsan

2020/02/06

ELAk, LABek eta CCOOek hitzarmen kolektiboaren alde mobilizatzera deitu dituzte otsailaren 6an Gipuzkoako Esku-hartze Sozialaren sektoreko langileak. Zehazkiago esateko, bi elkarretaratze izan dira: goizeko 11:00etan Aldundi-jauregiaren aurrean, eta 11:45etan udaletxearen ondoan.

Elkarretaratze horiek lehenak izan dira mobilizazioen agendan, hurrengoa otsailaren 14an, goizeko 09:00etan, izango da, LHKaren egoitzaren aurrean, hitzarmena negoziatzeko mahaiaren hurrengo bilerarekin bat.

Mobilizazio agenda horren bidez ELAren, LABen eta CCOOen asmoa zera da: sektoreko patronala benetako negoziazio bat egitera behartzea. Otsailaren 4ko bileran Hedatzen patronalak sektoreko egungo lan-baldintzak okertzeko neurriak proposatu zituen berriro. Neurri horien artean daude 2019rako soldatak izoztea eta proposatzen dituzten gainerako urteetarako (2020-2022) KPIaren bermerik eza, lantokiko bajen ehunekoaren araberako ABE osagarriak, plusen bateraezintasuna, probaldia 6 hilabetera luzatzea eta zehapen-araubidea berrikusteko proposamena.

Azkenik, sindikatuek dei egiten diete sektoreko langileei egungo hitzarmenaren defentsan mobilizatzera eta beren lan-baldintzak hobetzearen alde borrokatzera.