Gipuzkoako Foru Aldundiko garbitzaileek greba egingo dute apirilaren 25etik maiatzaren 7ra

2022/04/07
ELAk, LABek eta ESK-k greba deitu dute EULENen, Gipuzkoako Foru Aldundiaren mendeko eraikinak garbitzeaz arduratzen den azpikontratatutako enpresan, apirilaren 25etik maiatzaren 7ra, hitzarmen kolektiboaren negoziazioan enpresak KPIri lotutako planteamendurik egiteari uko egin diolako eta 2022an soldatak % 1,5 eta 2023an % 1,75 izozteko asmoa duelako. Greba deialdi berri hau otsailaren 22an, 23an, 24an eta 25ean egindakoaren jarraipena da. Sindikatuek ere erantzukizunak eskatu dizkiote Diputazioari, zerbitzuaren azken arduradunari, eta negoziazio-mahaian parte ez hartzea eta gatazkan esku ez hartzea leporatu diote, gutxieneko zerbitzuen alegazioak egiten dituen bitartean.

Langileek, gehienak emakumeak, azpimarratu dute soldatak KPIarekin ez lotzeak langileak pobretzea dakarrela. Salatu dute EULENek sektore feminizatuetan uko egiten diola aldarrikapen hori bere proposamen ekonomikoetan sartzeari; eta sartzen duela, ordea, sektore maskulinizatuetan.

Gaineratu dute EULENek soldatak KPIarekin lotzeari uko egiteaz gain, soldatak izoztea proposatzen duela. "Onartezina da enpresek soldataizozteak planteatzea, pandemia betean zerbitzua indartu eta handitu denean. Beste behin ere, langileekin jolasten ari dira enpresa etekinak handitzeko", deitoratu dute. Sektorean dagoen partzialtasuna % 80 ingurukoa da, eta 2021etik ari dira hitzarmena negoziatzen.

ELAk, LABek eta ESK-k azpimarratu dute Gipuzkoako Foru Aldundia dela zerbitzu horren azken arduraduna. Horregatik, hainbat aldiz eskatu diote Aldundiari pleguak irizpide ekonomikoen arabera ez esleitzeko. "Bere esku dago zerbitzua planteamendu ekonomiko baxuenari ez esleitzea. Aldundiak zerbitzu horretarako aurrekontuaren zenbatekoaren kalkulua egiten badu, nola berma daiteke zerbitzu bera aurrekontuaren % 15 gutxiagorekin?, galdetu dute.