Greba deitu dute ekainaren 24, 26 eta 28an lan baldintzak hobetuko dituen hitzarmena lortzeko

Joan den udatik gaur arte, Arabako hezkuntza aisialdiaren eta animazio soziokulturalaren parte soziala eta patronala 12 aldiz bildu dira hitzarmen duin bat lortzeko helburuarekin. 2022an iraungi zen hitzarmena, baina patronalak oraindik ez ditu bermatu alderdi sozialak planteatzen dituen gutxienekoak. Patronalak argudiatu du ezin dituela sindikatuen eskaerak onartu, erakundeen hitzarmen baldintzak direla eta, baina alderdi sozialak jakinarazi die ez dagoela prest erosahalmen eta eskubide gehiago galtzeko.

Azken negoziazio mahaian KPIarekin, lanaldi murrizketarekin, lanaldi irregularrarekin, antzinatasunarekin, ordaindutako baimenekin eta abarrekin lotutako gaiak landu dira, ezarritako gutxienekoak bermatu gabe, kontziliazioa edo egonkortasun ekonomikoa nekez ahalbidetzen duen prekarietate egoera iraunaraziz.

Hurrengo negoziazio mahaia ekainaren 19an izango da, baina akordiorik lortu ezean, ELA, LAB eta CCOO sindikatuek greba egingo dute sektorean ekainaren 24, 26 eta 28an, patronalaren proposamenekin ados ez daudela adierazteko, hitzarmen duin bat defendatzeko eta Arabako aisia hezitzailearen eta animazio soziokulturalaren sektoreko langileen bizi kalitatea bermatzeko.

Sektorean hainbat udal zerbitzu azpikontratatu daude, hala nola ludotekak, parketxeak, liburutegiak, museoak, turismo bulegoa, topaguneak, Gesaltza Añana, interpretazio zentroak, Santa Maria katedrala, udalekuak eta beste hainbat espazio. Guztira, 500 langile baino gehiago dira.