MUNDUKO BANKUAREN GAILURRA
Hiru protesta egun Munduko Bankuaren greenwashingaren aurka
Euskal Herriko Eskubide Sozialen Karta, EH Kapitalari Planto, Jauzi Ekosoziala eta beste hainbat eragileek agerraldia egin dute gaur, BECen aurrean prentsaurrekoa emateko. Bertan, maiatzaren 23an, 24an eta 25ean Barakaldon egingo den Munduko Bankuaren (MB) gailurraren aurkako borroka sozialaren dinamika aurkeztu dute.
Bertaratutako erakundeek adierazi dute MB-aren topaketa horrek berdez estali nahi duela erakunde honek pobretzearen eta larrialdi klimatikoaren gainean daukan erantzukizun zuzena, honek bere sorreratik finantzatu izan baitu hainbat herrialdeen espolioa.
Horregatik guztiagatik, salatu dute Innovate4Climate izeneko gailur hau energia-lobby-en estrategiaren barruan dagoela eta negozio berdeko nitxo bat sortzeko helburua baino ez duela. Gaineratu dute euskal alderdi neoliberalek ere etekina ateratzen dutela honetatik; hala nola EAJk eta PSEk, “horrela geure negozioaren gurpila eta bere lagunena elikatuz”.