Iberdrolako langileak kalera atera dira erosteko ahalmenaren galera salatzeko

2022/11/15
Iberdrolako langileek elkarretaratzea egin dute gaur Hegoaldeko lau hiriburuetan, soldaten erosteko ahalmenaren galera salatzeko, enpresak milioi askoko irabaziak lortzen dituen bitartean. 2011ko hitzarmeneko soldata-igoerarako KPIaren erreferentea ezabatzearen ondorioz, plantillak etengabeko pobretzea jasan du. Egoera horrek gutxienez 2025era arte iraungo du, data horretan amaitzen baita egungo hitzarmenaren indarraldia. 2015etik gehieneko soldata-igoera finkagarria % 0,7koa da.

ELA Iberdrolak iritzi publikoari helarazi nahi dio lehen enpresa elektrikoaren plantillak Europa mailan eta hirugarrena mundu mailan pairatzen duen errealitate gordina: etekinak handitzeko eta akziodunari urtean % 8ko ordainsaria emateko kalkuluak dituzten inbertsio-planak aurkezten diren bitartean, plantillaren soldata, gehienez, % 0,7 igoko da (zuzendaritzak bere aldetik ezarritako helburuen arabera).
Iberdrola bezalako milioi askoko irabaziak dituen enpresa bat ez bada gai erosteko ahalmena bermatzeko eta soldatak KPIarekin igotzeko, zein enpresak egin dezake hori?
ELAk uste du onura horien zati bat langileen artean banatzea beharrezkoa dela eta aberastasuna hobeto birbanatzen lagunduko duela. Horregatik, azaroaren 15ean, langileak Hegoaldeko lau hiriburuetan bildu dira enpresa horren egoitzen aurrean. Era berean, azaroaren 19an, larunbatean, langileak kalera aterako dira Bilbon, erosteko ahalmena defendatzeko.