Iceta ministroaren Aldi Baterako Lege Dekretuaren aurka bozkatzeko eskatu diete euskal alderdiei

2021/07/20
Atzo bezala, ELAk eta Interinok Taldeak hainbat mobilizazio deitu dituzte gaur goizean Lakuan, Iceta ministroak sustatutako Enplegu Publikoaren Errege Lege Dekretuaren aurka. Dekretu horrek milaka eta milaka langile publiko kaleratzea eragin dezake EAEn. Mobilizazio horiekin, ELAk dekretu hori atzera botatzeko eskatu die euskal alderdi politikoei.

ELAren iritziz, Enplegu Publikoari buruzko Lege Dekretua oso larria da, euskal autogobernuaren ahalmenean esku-hartze larria izateaz gain, sektore publikoko milaka langile kaleratzea ekar dezakeelako. ELAk ezetz esan dio dekretu honi, zeren eta:

  • Langile publikoen birjartze-tasak ezartzen ditu. Beraz, Espainiako Estatuak gure herrialdean behar ditugun langile publikoen kopurua ezartzen eta mugatzen jarraituko du.

  • EAEko behin-behineko 60.000 langile kaleratzeko atea irekitzen du, urte luzez gure herrialdean zerbitzu publikoak aurrera atera dituztenak.

  • Gainera, behin-behinekotasunaren abusua jasan duten langile horiei ez zaie benetan bermatzen poltsetan sartzea, ezta urteko 20 eguneko kalte ordaina ere.

  • Ez da proposatzen benetako neurririk etorkizunean egungo aldi baterako enplegu-tasak, enplegu suntsipena eta arlo publikoaren pribatizazioa berriro gerta ez daitezen saihesteko.

  • Horrek guztiak eragin ditzakeen ondorio larriez gain, Gobernuak gabezia demokratiko larriak dituen salbuespenezko bide batetik jo nahi du: Errege-Lege Dekretuaren bidez.