Jarraipen zabala izan du Bizkaiko adinekoen egoitzetan deitu den grebak

2014/02/06
Jarraipen zabala izan du Bizkaiko adinekoen egoitzetan deitu den grebak
ELAk azaldu duenez Bizkaiko 18 adineko egoitzetan greba erabatekoa izan da gaur eta beste hainbatetan gutxiengo zerbitzuak eragotzi dute grebaren jarraipen zabala. Eguerdi partean, ehunka pertsona elkarretaratu da Aldundiaren aurrean eta manifestazioa abiatu da bertatik. Egoitza hauetan 4.000 langilek dihardu, %98 emakumeak, kasu gehienetan 1.000 eurora iristen ez diren soldaten truke.

Lanuzte gehiago deitu ditu ELAk otsailaren 7, 27 eta 28an Bizkaiko hirugarren adineko egoitzetan, patronalak ez baitu jarrera aldatu negoziatzen ari diren puntu batzutan, esaterako derrigorrezko arbitrajea edota beharginen lan-baldintzak alde bakarretik aldatzeko aukera.

 

13 hilabetez negoziatu eta 6 egunetan lanuzteak izan ondoren, sektoreko enpresarioak hasierako puntuan kateatuta daude.

Blokeoaren ondorioz, hainbat egoitzetako langileek mobilizazioak areagotzea erabaki dute, zehazki Marcelo Gangoiti, Sanitas Barakaldo, San Jose Etxe Alai egoitzetan eta Igurko eta Trapagako eguneko zentroetan; deialdia martxoan bi asteko greba egiteko da; akordiorik ezean, apirilera ere luzatuko lirateke. Litekeena da datozen egunetan egoitza gehiagok martxoko lanuzteekin bat egitea, zentro gehiagotan izango baitira batzarrak.