Kale Garbiketako langileek greba mugagabea iragarri dute Donostiako manifestazioan

Hamaika hilabete eta 13 bilera egin ondoren, Gipuzkoako Kale Garbiketaren hitzarmenean (zaborren bilketa, zabortegiak, erraustegiak, hondartzen garbiketa, gaikako bilketa, birziklatze plantak eta estolderia) lan egiten duten 1.500 pertsona baino gehiagok, ASELIP eta SERBITZU patronalak hitzarmenaren negoziazioan egiten ari diren blokeoa salatu dute.
Hori dela eta, ehunka pertsonak manifestazioa egin dute gaur Donostian eta sektore osoan greba mugagabea iragarri dute abenduaren 22tik aurrera. Pandemiaren garaian, sektore hori guztiz beharrezkoa eta funtsezkoa zen gizartearentzat. Hala ere, bere lan-baldintzak negoziatzea tokatzen denean, bigarren mailako eta garrantzirik gabeko bihurtzen da.
ELAk, ordezkaritzaren % 60,78 duen sindikatu nagusiak, errespetua eta baldintza duinak eskatu ditu eguneroko lanik desatseginetako bat egiten duen sektorearentzat. Pertsona horien eguneroko ahaleginari eta lanari esker bakarrik lortzen da gure kaleak, herriak, hondartzak eta abar zabortegi baten antzekorik ez izatea.
ELAk gaur egungo lan-baldintzak duintzea eskatzen du, eta, horretarako, nahitaez hobetu behar da txanda-kontratuaren aplikazioa, erosteko ahalmena bermatu behar da (gutxienez, KPIaren igoera), lanbide-kategoriak egokitu behar dira, eta beste hobekuntza batzuk egin behar dira hitzarmen honen idazketan.
Langileek egindako aldarrikapenei erantzun positiborik eman ezean, abenduaren 20an, 22etatik aurrera, greba mugagabea hasiko da Gipuzkoa osoan. Horregatik, eta egoeraren larritasuna ikusita, ELAk udalen eta mankomunitatearen inplikazioa eskatu du, eragile aktiboak izan daitezen patronalaren jarrera aldatzeko.
Ezin da inhibiziorik egon gure herri eta hirien osasungarritasunari eragingo dion lan-gatazka baten aurrean. Horregatik, ELAk erantzukizunez jokatzeko deia egiten die bai patronalari bai administrazio publikoei, horiek baitira, zalantzarik gabe, gure kaleak, hondartzak, ibaiak eta abar garbitzeko ardura handiena dutenak.