Lakuntzak LABen Kongresuan azpimarratu du kontrabotere sozial eta sindikalaren beharra gizartea eraldatzeko

2022/06/17
Lakuntzak LABen Kongresuan azpimarratu du kontrabotere sozial eta sindikalaren beharra gizartea eraldatzeko
ELAko idazkari nagusiak gogorarazi du egun ez dagoela aliantza estrategikorik LABekin, nahiz eta helburu sindikalak eta politikoak bat etorri. Mitxel Lakuntzak, ELAko idazkari nagusiak, LAB Miarritzen 'Bagara Bagoaz' lelopean egiten ari den 10. kongresuan parte hartu du, eta bertan dauden 500 ordezkarien aurrean egindako hitzaldia baliatu du “gizartea eraldatzeko kontrabotere sindikal eta sozialaren beharra” azpimarratzeko; “hortik bakarrik landu daitezke alternatibak eta lorpenak”.

Ildo horretan, Lakuntzak gogorarazi du “ELA eta LAB ez direla Estatuko sindikalismoaren azpisistema bat; Euskal Herrian dozenaka greba daude martxan, dinamika propio bat, eta horregatik ez da kasualitatea greba gehien egiten diren Europako lurraldea izatea, bereziki sektore feminizatuetan eta neurri handi batean generoko soldata-arrakalaren aurka”.
Bestalde, Lakuntzak gogorarazi du “ELA eta LABen arteko aliantza estrategikorik ez dagoela gaur egun, nahiz eta sindikatu biek bat egin gai sindikal, sozial eta politiko askotan, hala nola euskal errepublikaren aldeko apustuan”. ELAren idazkari nagusiak Mixel Berhokoirigoin Iparraldeko militante historikoa ere aipatu nahi izan du, orain urtebete hil baitzen, eta hark esaldi batean laburbildu zuen borroka sozialaren balioa: «Euskal Herrian eraikuntza masiborako tresnak ditugu».