Lan baldintzen prekarizazioaren aurkako greba

DIGI telekomunikazio enpresa bat da, eta 200 langile baino gehiago ditu EAEn eta Nafarroan. Langileek hiru greba egun egin dituzte urriaren 14, 15 eta 16an, lan baldintzak eta enpresaren jarrera salatzeko.

Hego Euskal Herrira iritsi zenetik, hainbat lan gatazka sortu dira DIGIn: hitzarmen probintziala ez aplikatzea, joan etorriak benetako lan denboratzat hartzeari uko egitea, justifikatu gabeko kaleratzeak eta lan arloko ez betetzeak, besteak beste.

Arazo horiei gehitu behar zaie enpresaren eta CCOO eta UGT sindikatuen arteko Estatu mailako hitzarmen baten negoziazioa, ELA sindikatuari ez baitzaio horren berri eman. ELAk uste du prozedura irregularra dela eta hitzarmen berri horrek atzerakada larria ekarriko duela langileen baldintzetan.

Lan prekarietatea hertsiki lotuta dago arriskuen prebentzioaren, kontziliazioaren eta faktore psikosozialen narriadurarekin. Hori dela eta, plantillak hiru greba egun deitu ditu, eta urriaren 16an Bilbon elkarretaratze bateratua egin dute Hego Euskal Herriko lantokietako langileek.

Mobilizazioetan, DIGI grebarako eskubidea oztopatzen saiatu da, legez kanpoko gutxieneko zerbitzuak ezarriz eta mehatxuak eginez.

ELAk ohartarazi du greba ziklo hau amaitu ondoren, ez duela baztertzen mobilizazioen egutegia luzatzea, egungo lan baldintzei eustea eta lurralde bakoitzeko sindikatuen legitimitatea errespetatzea lortu arte.