Laneko jazarpena

Lan istripu gisa hartu du epaileak Gorlizko udaltzain batek sufritutako antsietate baja

2023/02/27

Epaileak arrazoia eman dio ELA sindikatuaren Bidelagun Fundazioari, eta Gorlizko Udaleko udaltzain baten antsietate baja, lankide baten jazarpenagatik sufritutakoa, lan istripu gisa hartu du. Mediku txostenak argi dio baja lanean izandako egoera larriaren ondorio zuzena dela.

Bilboko Lan Arloko 2. zenbakiko Epaitegian hartu dute erabakia eta, ELAk jakin duenez, jazartzaileak lanean jarraitzen du. Epaiak frogatutzat ematen du Udalak 2019tik zuela egoeraren berri baina ez zuela neurririk hartu eta, azkenik, 2021ean hartu behar izan zuela baja langileak.

Udalaren pasibotasuna

Epaiak jasotzen duenez, erasotzaileak jarrera iraingarriak izan zituen eta demandatzaileari buruzko lekuz kanpoko iruzkinak egin zituen. Era berean, agerian geratu da Udalaren pasibotasuna.

Bidelagunek, osasuna sustatzeko ELAren Fundazioak, eraman du kasu honen zuzendaritza juridikoa. Oso positibotzat jo du epaia eta oso larritzat Gorlizko Udalaren pasibotasuna langileak jasandako etengabeko jazarpen egoeraren aurrean, antsietate baja eragiteraino.

Horregatik, Bidelagunek ekintza judizialak hasiko ditu Gorlizko Udalaren kontra, segurtasun neurrien ezagatik, eta ez duelako langilea babesteko eta indarkeriarik gabeko lan giro osasungarri bat eskaintzeko legezko betebeharra bete.