Langabetuen %57,5 emakumeak dira

2021/10/04
Enplegu Zerbitzu Publikoak argitaratutako datuen arabera, HEHn erregistratutako langabeen kopurua 4.133 pertsonatan murriztu da, enplegatu gabe dauden pertsonak 152.180 dira. Aurreko hilabeteetan ez bezala, iraileko datuek erakusten dute langabeziaren jaitsierak Nafarroan eta EAEn izan duela eragina. EAEn 2.768 pertsona gutxiago daude lanik gabe, eta Nafarroan, zazpigarren hilabetez jarraian murriztu da desenplegua, oraingoan 1.365 pertsonatan. Hala ere, langabezia-tasa Europar Batasunekoa baino askoz handiagoa izaten jarraitzen du, % 11,4koa; aldiz, Europakoa %6,8koa da.

Esan beharra dago Covidaren krisiak ez duela emakumeen egoera aldatu, langabeen %57,5 izaten jarraitzen dute. Bestalde, gazteen langabezia berriro ere igo da, irailean 350 pertsonatan eta jadanik 13.106 gazte daude egoera honetan.

Langabezia eta lan-prekarietatea zuzenean lotuta daude. Abuztuan egindako kontratuek aurreko hilabeteetako ezaugarri berberak izaten jarraitzen dute: prekarioak eta aldi baterakoak. Kontratuen behin-behinekotasunak oso altua izaten jarraitzen du, abuztuan sinatutako kontratuen ia %91,4 izan dira mota honetako kontratuak.

Udazken honetan biziko dugun ziurgabetasun-egoeraren aurrean, ezinbestekoa da mobilizazioa, lan-prekarietatearekin amaituko duten eta sektore publikoan zein pribatuan lan-baldintzak duinduko dituzten neurrien alde borrokatzeko. Horrenbestez, ezinbestekoa da lan-erreforma indargabetzea, bai eta administrazioek inbertsio handiagoa egitea ere, besteak beste, behin-behinekotasun handiarekin amaitzeko.