Enpleguak okerrera egin du eta genero-arrakala handitu da

Urteko lehen hiruhilekoan 19.800 pertsona okupatu galdu dira aurreko hiruhilekoaren aldean. Jaitsiera, balio erlatibotan, handiagoa da Nafarroan (-%2,9), 9.200 pertsonako jaitsiera handiarekin; EAEn zifra  handiagoa da (9.700) , baina portzentaje txikiagoa (-%0,9). Enpleguaren suntsiketa batez ere emakumeen artean kontzentratzen da, 13.800 okupazio galdu baitituzte; gizonek, ordea, 5.000.

Urte arteko datuei dagokienez, 6.500 pertsona gehiago daude okupatuta. Hala ere, bilakaera positibo horrek emakumeen narriadura handia ezkutatzen du, horien artean 16.400 enplegu suntsitu direlako, genero-arrakala handitu dela agerian utziz.

Lanaldi partzialeko enpleguak antzeko mailetan jarraitzen du, %14,2ko tasarekin, aurreko hiruhilekoan baino bi puntu gutxiago. Jaitsiera horren arrazoia ez da enpleguaren kalitatea hobetzea, lanpostu mota horiek suntsitzea baizik. Partzialtasunak oso modu desberdinean eragiten du: emakumeen %22,6k lanaldi partzialean lan egiten du, eta gizonen %6,8k.

Behin-behinekotasunak maila altuetan jarraitzen du, %18,2an kokatuz. Gainera, azken hiruhilekoan gizonen eta emakumeen arteko aldea handitu egin da, tasa %14,3 da gizonen artean eta %22,2 emakumeen artean, horrela emakumeen prekarietatea betikotzen ari da.

Langabeziak ere ez du datu positiborik izan. Langabeziak gorakada handia izan du eta %8,4an kokatu da, 0,8 puntuko igoera eta duela bi urteko mailetara itzultzea. Langabezia-tasa %9,5ekoa da emakumeen artean, eta % ,5ekoa gizonen artean. Bestalde, gazteen langabeziak ere okerrera egin du nabarmen, eta %20tik gorakoa da berriro, hain zuzen, %22koa.

Oro har, 2026. urtearen hasierak lan-testuingurua nabarmen okertu dela erakusten du. Enpleguaren suntsiketak, langabeziaren gorakadak eta prekarietate-maila altuen egonkortzeak, bilakaera negatiboa berresten dute, bereziki emakumeei eta gazteei eragiten diena.