Langabezian zeuden %55k ez zuen prestaziorik jaso

2021/11/03
Hego Euskal Herrian 1.623 langabe gutxiago daude, 1.063 EAEn eta 560 Nafarroan. Datu horiek erakusten dute moteldu egin dela aurreko hilabeteetan gertatzen ari zen beherakada. 2019ko urriaren aldean, datuak ez dira hain positiboak, 3.358 langabe gehiago baitaude oraindik, eta kontuan izan behar da 9.555 pertsona daudela ABEEn, Gizarteratze Ministerioak emandako datuen arabera. Enplegu Zerbitzu Publikoak argitaratutako langabezia datuek erakusten dute behera egin duela kopuruak, enplegu prekarioa sortzearen kontura.

Bestalde, gazteen langabeziaren jaitsiera gelditu egin da eta 107 gazte gutxiago daudeda bakarrik oraingoan. Gainera, 25 urtetik beherakoen artean langabeziak pandemiaren hasieran baino handiagoa izaten jarraitzen du. Beraz, azken hilabeteetako beherakadak ez du konpontzen inola ere biztanleria gazteak bizi duen egiturazko arazoa.

Urrian egindako kontratuek aurreko hilabeteen ezaugarri berberak izaten jarraitzen dute: prekarioak eta aldi baterakoak dira, eta egindako kontratuak nabarmen murriztu dira 2019ko urriarekin alderatuta. Beste behin, kontratazio mugagabea ez da iristen sinatutako kontratuen %10. Horrela, aldi baterako kontratazioa % 92ra iritsi da urrian.

Prestazioei buruzko datuak negatiboak dira; izan ere, langabezian inskribatutako pertsonen %55k ez zuten inolako langabeziaprestaziorik jaso irailean, aurreko hilean baino %6 gehiago suposatzen du datu horrek. Eta lau pertsonatik batek bakarrik jaso zuen langabezia saria.

Lan erreformen indargabetzearen inguruko zehaztasun ezak, eta Espainiako Gobernuak negoziazioa elkarrrizketa sozialeko mahaira eraman nahi izanak, zera iragartzen du: akordioak ez dituela lan erreforma horien ondorioak konponduko. Egoera horren aurrean, ELAk PPren eta PSOEren 2010eko lan erreformak erabat indargabetzea exijitzen du, langile klasearen lan baldintzak duintzeko funtsezko urrats gisa.