Langile guztiei mesede egingo liekeen funtsezko neurririk hartu gabe jarraitzen du Gobernuak

Funtzio Publikoak Administraziorako Berdintasun Plana aurkeztu du Mahai Orokorrean. ELA bat dator INAIk genero-arrakala ezabatzeko eta emakumeek jasaten duten egiturazko diskriminazioarekin amaitzeko beharrari buruz duen ikuspegi teorikoarekin, baina sindikatuak adierazi du berdintasun-plan bakarra ez dela eraginkorra izango arrakala hori neutralizatzeko orduan. Beharrezkoa da diagnostiko bat egitea eta, ondoren, plan espezifiko bat egitea sektore eta/edo erakunde autonomo bakoitzeko. Bestela, zehaztasunik ezak neurri positibo zehatzak aplikatzeko zailtasunak ekarriko ditu, aurkeztutako planean gertatzen den bezala. Bai partzialtasunak bai behin-behinekotasunak eragin handiagoa dute emakumeengan, Planak berak adierazten duen bezala, baina diagnostikoaren ondoren Plana ez da gai arazo horri aurre egiteko neurriak zehazteko. Horregatik, ELAk Berdintasun Planaren aurka bozkatu du.
Foruzaingoaren Erregelamenduari dagokionez, ELAk ez dio babesik eman, sindikatuak arbuiatu egin baitzuen Nafarroako Poliziei buruzko 23/2018 Foru Legearen garapenerako erregelamendua baita.

Bestalde, Nafarroako Suhiltzaileen Zerbitzuko akordioari dagokionez, ELAk berriro salatu du ez dela negoziaziorik egon Mahai Sektorialean, eta, gainera, Barne Departamentuak, LABek eta UGTk adostutako igoerak ez duela bermatzen erosteko ahalmena berreskuratzea.

ELAren ustez, beharrezkoa da soldatak Nafarroako KPIaren arabera igotzea langile publiko guztiei, baita behin-behinekotasuna errotik murriztea ere. Helburu horiek lortzeko, sindikatuak argi du mobilizazio jendetsuak egin beharko direla eta horietan parte hartzera animatzen du langileria.