Bilboko polikiroldegi publikoak

Lanuztea egin du plantillaren % 60k, ELAk deituta

2023/02/27
Soldata osorik ordaintzen ez dietelako egin du lanuztea gaur, 9:00etatik eguerdira bitartean, Bilboko polikiroldegi publikoetako laguntzaileen eta kirol kudeaketako langileen % 60. “Oso modu positiboan” baloratu du mobilizazioa Euskal Sindikatuak.

EmteSPORT enpresak kudeatzen ditu Bilboko polikiroldegietako langileak iazko azarotik, eta behar dutena baino gutxiago ordaindu dizkie hile guztietan. Akatsa onartu du zuzendaritzak, baina konponbiderik ez du oraindik aurkeztu. Horregatik hasi dituzte lanuzteak langileek.

Bilerak izan ditu ELAk arduradunekin, baina soluziobiderik ez dizkiote eman. Langileek, bere partetik, enpresarekin komunikazio zuzena izatea ezinezkoa dela kexu dira eta erantzun zuzenak inoiz ez dituztela jasotzen salatu dute.

Egoera horretan, kirol kudeaketako langileek (sorosleak, irakasleak...) eta langile laguntzaileek (harrerako plantillak...) lanuzte partzialak egingo dituztela esan zuten. Gaurkoa izan da lehen eguna eta hurrengoak dira datozen datak eta orduak:

Otsailak 28, asteartea: 16:00etatik 19:00etara
Martxoak 6, astelehena: 16:00etatik 19:00etara
Martxoak 7, asteartea: 9:00etatik 12:00etara