Lehen greba egunaren jarraipena oso zabala izan da, eta %50era iristen da grebarekin bat egin dezaketen langileen artean

Gaur, SATSE, ELA, LAB, SME, CCOO eta UGT sindikatuek deitutako bi grebetako lehen eguna izaten ari da gaur Osakidetzan. Goizeko 09.30tan mobilizazio masiboak egin dira hiru lurraldeetako ospitale nagusietan, eta 13etan Lehen Arretan egingo dira elkarretaratzeak.

Azken deialdietan ohikoa izan den bezala, jarraipena bereziki garrantzitsua izaten ari da Lehen Arretan, eta horrek agerian uzten du, beste behin ere, arreta-maila horrek jasaten duen egoera larria, bai eta langileen haserrea ere. Ildo horretan, azpimarratu behar da, aurreko deialdietan bezala, Bezeroaren Arretarako Guneetako langileak lanuzteekin bat egiten ari direla modu masiboan, eta erizainen eta fakultatiboen artean jarraipena nabarmen handitu dela ere. Gasteizko Zaramaga, Salburua eta San Martin osasun-zentroak itxita daude. Gauza bera gertatu da Lasarte, Zaratamo, Gernika edo Lemoako osasun zentroetan. Basaurin edo Hernanin, esaterako, gutxieneko zerbitzuak bakarrik ari dira lanean, eta Galdakaon eta Arrigorriagan ere jarraipena oso zabala izaten ari da. Pasa den apirilaren 27an greba egin zuen Arabako landa-eremuan, jarraipena % 80koa izaten ari da.

Gainerako arreta-mailek ere gogor egin dute bat lanuzteekin. Gurutzetako Ospitaleko biltegia langile bakarrarekin hasi du eguna, eta erresonantzia magnetikoko zerbitzua itxita dago; Galakaoko endoskopiako eta ebakuntza-geletako zerbitzuak gutxieneko zerbitzuekin bakarrik ari dira lanean; Urdulizko Ospitaleko traumatolgoian pertsona bakarra ari da zerbitzuak ematen; Galdakaoko Ospitaleko kanpo-kontsultetan erizainen arteko inpaktua oso handia izan da; Mendaroko Ospitaleko ospitalizazioko eta larrialdietako zeladoreak gutxienekoekin bakarrik ari dira lanean; Arabako ESIan ebakuntza-gela batzuk itxi dira, eta aipatzekoa da izpien zerbitzuan izandako intzidentzia handia. Donostia Ospitalean, bestalde, Kirurgia Handi Anbulatorioko zerbitzua gutxieneko zerbitzuekin bakarrik hasi du eguna. Zumarragako ospitalean, ebakuntza-gelak itxita daude.

Aipamen berezia merezi du Transfusio eta Giza Ehunen Euskal Zentroak: ez da autobusik atera donazioak egiteko eta laborategia itxita dago.

Eta hori guztia, milaka langile grebarako eskubiderik gabe utzi dituzten gutxieneko zerbitzuak gehiegizkoak izan arren. Kolektiboaren greba-eskubidea neutralizatzeko, eragozteko eta erasotzeko beste ahalegin baten aurrean gaude. Lan Sailak emandako Gutxieneko Zerbitzuen Aginduaren eduki murriztaileaz gain, salatu behar dugu hainbat ESIetako zuzendaritzek greba neutralizatzeko eta zailtzeko ahalegina egin dutela, Agindua modu murriztailean interpretatuz eta bertan jasotakoaz haratago doazen gutxieneko zerbitzuak ezarriz. Aurreko deialdietan grebarako eskubidea urratu dela aitortzen duten epaiak ugariak dira. Zoritxarrez, berriro salatu behar dira jarrera hauek. Gainera, ESIetako zuzendaritzek sindikatuei jarraipen-daturik ez emateko agindua eman dute.

Sindikatu deitzaileek salatu nahi dute plantillaren egoera gero eta prekarioagoa dela: plantillaren ia erdia behin-behinekoa da, eta horrek esan nahi du, EPE bat bestearen atzetik egiteaz gain, ez dutela gutxieneko egonkortasunik beren kontratuetan; lanpostu asko hutsik uzten dira erretiroen ondoren; ez dira bajak eta bestelako absentziak betetzen; lan-gainkarga sistematikoa dago kategoria guztietan; hautaketa-prozesuak solapatu egiten dira, eta, ondorioz, langileak aldi berean hainbatetan daude murgilduta; egutegian eta lan-karteldegietan aldaketa izaten dituzte etengabe; eta abar luze bat. Osasun Sailak ez du neurri bakar bat ere proposatu plantillaren lan-baldintzak hobetzeko. Ez dago profesionalak Osakidetzan mantentzeko edota erakartzeko planik. Are gehiago, langileen tratu txar sistematikoa dago. Testuinguru horretan, Mahai Sektoriala erabat blokeatuta jarraitzen du. Osakidetzak sistematikoki uko egiten dio sindikatuek planteatutako gaiak jorratu eta negoziatzeari.

Bihar, maiatzak 19, Osakidetzako langileak berriro daude grebara deituta, baita eguerdiko 12etan Bilbon (Jesusen Bihotza), Donostian (Boulevard) eta Gasteizen (Buruileria plaza) egingo diren manifestazioetan parte hartzera ere. Sindikatuek mobilizazioetan parte hartzeko deia egin diete herritarrei ere.