Maureen Ada Otuya eta Jenny Sofía Rebolloren hilketak salatzeko mobilizazioak

ELAko Genero Berdintasun Politiken Saileko arduradun Jone Bengoetxeak nabarmentzen duenez, hilketa hauek gizarte matxista, arrazista eta klasista bat erretratatzen dute beste behin. “Izen eta abizen esplizituak zituzten bi emakumeren hilketaren aurrean gaude, bi bizitza konkretu. Berriz ere gizon batek eraildako bi emakumeren aurrean gaude. Eta, bien bitartean, gizartearen eta hedabideen parte bat gertatutakoa ekimen isolatu eta egoeraren araberakoa bezala aurkezten saiatzen dira, bizi dugun egituraketa sozialarekin inolako zerikusirik izango ez balu bezala”.

Bengoetxeak nabarmentzen duenez gizonen eta emakumeen arteko desberdintasuna eta indarkeria sexista ez dira ez ekintza puntualak ez kontzeptu abstraktuak. “Egunero eta sarritan errepikatzen dira, era hautemanezinean, horrelako ekintzak zergatik gertatzen diren galdetzen duen gizarte baten begien aurrean. Diagnostikoan ados jartzen ez bagara zaila izango da gaitz kroniko hau errotik kentzea”.

“Gainera, –gaineratzen du–, biktimek bizi zuten ikusezintasun egoera salatu nahi dugu; biktima hauek ez dira estatistika ofizialetan aintzat ere hartzen, euren jatorri nazionala edo/eta lan eta bizi baldintzak kausa”.

Azkenik ELAk bere babesa eta elkartasuna erakutsi nahi die hildako bi emakumeen senide eta ingurukoei.