ELKARRIZKETA RADIO EUSKADIN
“Eskandalua da Zedarriakek armamentuari buruzko proposamenaren aurka alderdi batek ere ahotsa ez altxatzea”
ELAko idazkari nagusia Radio Euskadin elkarrizketatu dute gaur, besteak beste, Guardianen itxiera eta industria sektorearen erronkak, Zedarriak lobbyaren proposamena energia nuklearrean eta armamentuan inbertitzeari buruz, Euskal Herrian LGS propioa lortzeko jarraitu beharreko bideari buruz eta hezkuntza publikoko grebari buruz hitz egiteko.
Guardian enpresaren itxiera iragarpenaz galdetuta, Lakuntzak azaldu du "enpresa kapituluka ixteko" prozesu baten parte dela. Gogorarazi du planteatzen diren argudioak ez direla "sinesgarriak", eta "agerikoa" dela "enpresa bideragarria" dela. Enpresak zati batzuk banandu ditu inbertsio funts bati saltzeko "diru publikoarekin finantzatutako estrategia batean", eta orain beste zatia itxi nahi du, salatu duenez. Lakuntzak dioenez, "orain presio politikoaren garaia da itxiera saihesteko".
"Herri honen pisu industriala jaisten ari da", eta politika industrialetan "inolako aldaketarik" ez dagoela adierazi du: "Pradalesekin Urkullurekin nire arazoak izaten jarraitzen dugu, sakoneko politikak ez dira aldatu". Euskal industriak, egungo testuinguruan, "bultzada publikoa" behar du, Lakuntzaren hitzetan. Horren adibide da hainbat euskal enpresa, Euskaltel kasu, inbertsio funtsei saldu zaizkiela: "Horrela, ondare publikoaren zati bat esku pribatuetan amaitzen da". Bultzada publikoaz gain, Lakuntzak trantsizio ekosozialaren norabidean inbertsio handiagoa egitea aldarrikatzen du, Zedarriak Lobbyak proposatutako energia nuklearraren eta armagintzaren inbertsioaren kontrako norabidean, hain zuzen ere.
"ELAri oso kezkagarriak iruditzen zaizkio Zedarriak bezalako lobby enpresarialek markatu nahi dituzten adierazpenak eta bidea", kritikatu du, eta politikaren etorkizunak "demokrazia, eskubide sozialak eta bakea defendatzea" izan behar duela defendatu du. Era berean, salatu du Zedarriakek bere bide orriaren berri eman zuen foroan erakundeak eta EAJ, PSE-EE eta EH Bildu zeudela, baina "inork ez zuela ahotsa altxatu entzuten ari zirena benetako eskandalua zela esateko".
Euskal Herrian LGS propioa lortzeko proposamenari buruz, Lakuntzak azaldu du nola kalkulatu duen ELAk 1795 euroko zenbatekoa: "Sortzen den aberastasunaren % 65 soldatetan islatzea lortu behar da, aberastasuna modu bidezkoagoan banatzeko". Gainera, gaineratu du Eusko Jaurlaritzak berak bizitza duin baterako pobrezia edo soldata nahikotasunaren lerroa 1600 euro inguruan kokatzen duela, eta hori ere kontuan hartu dela. Alde batetik, sindikatuek patronalari eskatu diote lanbide arteko gutxieneko soldata lortzeko, baina Lakuntzak ohartarazi du: "gustatuko litzaiguke patronalak benetako borondatea izatea negoziatzeko, baina badakigu zer kostatzen zaigun enpresetan KPI negoziatzea. Erronka izugarria da ". Horregatik planteatu du ELAk beste sindikatuekin batera beste bide orri bat: Gasteiz eta Iruñeko parlamentuetan Herri Ekimen Legegile bat bultzatzea, Langileen Estatutua aldatu eta Euskal Herrian LGSa erabaki ahal izateko. Ekimena aurrera aterako balitz, 200.000 pertsona izango lirateke onuradun EAEn, eta 80.000 Nafarroan, bereziki sektore pobretuenetan, gogorarazi duenez.
"Oso agerian geratu da grebaren arrakasta", dio Lakuntzak hezkuntza publikoko grebari buruz galdetu diotenean. Sindikatuen arabera, jarraipena % 75ekoa izan da, eta Eusko Jaurlaritzak berak "orain arteko kopururik altuena eman du", gogorarazi du. Administrazio publikoko langileek eta hezkuntzako langileek ere 15 urte daramatzate hitzarmen blokeatu batekin, ELAko idazkari nagusiak azaldu duenez. Erabakiak "alde bakarrez" hartu direla esan du, eta horren ondorioak izan direla erosteko ahalmenaren % 20ko galera, behin-behinekotasun handia eta lan karga handiak. Eusko Jaurlaritzaren paperari dagokionez, Lakuntzak salatu du "ez diela aldarrikapenei erantzuten eta beste aldera begiratzen ari dela". Hezkuntza sailburuak elkarrizketarako deia egin du "grebari zilegitasuna kentzeko", baina Lakuntzaren esanetan, "ez da negoziatzen ari langileen aldarrikapenei erantzunez, eta ez da mahaira edukirik eramaten ari".