Mitxel Lakuntza: “Propaganda gorabehera, errealitatea da Eusko Jaurlaritzak ez duela industria politikarik”

ELAren idazkari nagusia Radio Euskadin elkarrizketatu dute, eta hainbat gai jorratu ditu, hala nola gerra komertziala, industria politika eta Guardian edo Bridgestone bezalako enpresen egoera eta LGS propio baterako proposamena lortzeko bidea, besteak beste.

Trumpek aste honetan bertan bultzatutako gerra komertzialaz galdetuta, Lakuntzak honako irakurketa hau egin du: “Egoera ekonomiko ezezagun batean gaude, sistema kapitalistari zuzenean lotuta dagoena. Trump muga zergak xantaia gisa erabiltzen ari da AEBko ekonomiaren posizioa hobetzeko. Ez da erraza jakitea, ezta epe laburrean ere, zein izango diren ziurgabetasun handiko egoera ekonomiko honen ondorioak”. Era berean, ohartarazi du aurreikus daitekeela enpresa batzuek muga-zergen gerraren aitzakia erabiliko dutela plantillak murrizteko.

Hala ere, azken egunotako kaleratzeei edo lantegiak ixteari buruzko erabakiak egoera horren aurrekoak direla adierazi du, eta “plantillak kaleratzeko mugarik eta eragozpenik ez duen industria politika neoliberal baten ondorio” direla dio, "2012ko lan-erreformarekin oso lotuta dagoen zerbait”. Egoera horren aurrean, honako hau kritikatu du: “Eusko Jaurlaritzaren industria politika ekintzarik eza izan da, eta merkatua bakarrik arautzen dela dioen politika neoliberalaren maxima gorenera eramatea, Euskaltelen deskapitalizazioarekin gertatu zen bezala”.

Lakuntzak kritikatu duenez, Eusko Jaurlaritzak “ez du industria-politika propiorik, eta enpresa bat azpikontratatzen ari industria-politikaz ardura dadin”. Honen aurrean, azaldu duenez, “ELAri gustatuko litzaioke sustraitzea sustatuko lukeen industria-politika bat egotea”, eta gogorarazi du hori “gaur egun existitzen ez den inbertsio publiko batetik abiatuta” soilik egin daitekeela. ELAk fiskalitatearen bidez finantzatutako funts bat sortzeko beharra planteatu du, gutxienez 3200 milioiko zuzkidurarekin, Eusko Jaurlaritzak parte har dezan eta lehiaketa fasean aurkez dadin, enpresak salbatzeko eragile erabakigarri gisa, baina “horretatik oso urrun gaude”, baieztatu du.

ELAko idazkari nagusiak azaldu duenez, sindikatuak proposamenak egiten dizkio Eusko Jaurlaritzari, “kontuan hartzen ez direnak”: 3200 milioiko funtsa aktibatzea, euskal enpresen sustraitzean inbertitzeko erabili beharko liratekeen BGAEen gaineko proposamena...

Halaber, ELAk inplikazioa eskatu dio Lehendakariari, Euskal Herrirako LGS propioa lortzeko. “Ezinezkoa da 1184 eurorekin bizitzea herri honetan”, salatu du Lakuntzak. “Lehendakariak patronalari soldatak igotzea beharrezkoa dela esatea nahi dugu”.

Gainera, ELAk Lehendakariari eskatu dio babes dezala Langileen Estatutua aldatzea abiatuko den Herri Ekimen Legegilea, EAEren esparruan LGS erabakitzeko helburuarekin. “Sinadurak bildu ondoren, galdera bat iritsiko da Legebiltzarreko saio batera, eta alderdi politikoek erantzun beharko dute ados dauden ala ez hemen gutxieneko soldata ezartzearekin. ELAri gustatuko litzaioke erantzuna baiezkoa izatea”, adierazi du.