Mitxel Lakuntza, Novaltiako langileekin, greban uztailaren 22tik

2020/03/03

Mitxel Lakuntza ELAko idazkari nagusiak bisita egin die gaur goizean Novaltia banatzaile farmazeutikoko langile grebalariei, Zamudioko instalazioetan, sindikatuaren babesa eta elkartasuna adierazteko. Langile horiek greba mugagabean hasi ziren iazko uztailaren 22an, beren hitzarmenaren alde. Ekoizpen-arloko langileek egiten dute greba batez ere (22 langile inguru, plantillaren erdia gutxi gorabehera).

Grebaren helburuak hauek dira: enpresa-hitzarmena berreskuratzea, azpikontratazioa mugatzea eta behin-behineko kontratuen baldintzak hobetzea, gehiegizko klausularik gabe. Langileek eskatzen dute, halaber, soldata-hobekuntzak eta azken kontratazioetako eskala bikoitza ezabatzea.

Negoziazioak orain ito-puntuan daude.

Ildo horretan, Mikel Etxebarrria Industria eta Eraikuntzako arduradunak gogor kritikatu du Lan Ikuskaritzaren papera gatazka horretan; izan ere, greba-eskubidea urratu dela sindikatuak behin eta berriz egindako salaketen aurrean Lan Ikuskaritza besoak gurutzatuta geratu baita. "Novaltia modu sistematikoan urratzen ari da langile horien greba-eskubidea: lanak kanpora ateraz, langileak ABLEen bidez ordeztuz, eta hori guztia Lan Ikuskaritzaren utzikeriaren aurrean egiten du. Lotsagarria da " salatu du.

Enpresa hori Euskadiko farmazia-banatzaile nagusia da, eta bere farmazia elkartuen sarea sendagaiez hornitzen du. 2019ko hasieran erabaki zuen enpresa-hitzarmena berritzeko negoziazioak etetea eta estatuko hitzarmena aplikatzea.