Mobilizazio sozial eta sindikalak lortu du Sidenorrek Israelera egin behar zituen bidalketak geldiaraztea

Egun batzuk baino ez dira igaro hedabideek iragarri zutela Sidenorrek altzairu bidalketak egiten ari zela Israelera. Euskal altzairuaren enpresa erraldoiak, 2024tik bidali du altzairua Israelera, zehazki, IMI Systems Israelgo armagileari, armada hornitzen duen enpresa.

Informazio horren berri izan bezain laster, ELAk, beste sindikatu batzuekin batera, informazio hori egiaztatzeko eskatu zion enpresari, baina ez da enpresaren aldetik erantzunik jaso, eta egiaztatuz gero, bidalketa etetea eskatu zen. BDZk (Boikota, Desinbertsioa eta Zigorrak) eta sindikatuek egindako presio sozialari esker, Sidenorrek bere planetan atzera egitea erabaki du. ELAren iritziz, euskal langileei egotz dakiokeen garaipena da.

Eusko Jaurlaritzak, kasu honetan, eta beste erakunde batzuek, genozidioa bultzatzen duten enpresekiko lankidetzari boikotari dagokionez, irmotasun berarekin ez jokatzea gaitzesten du ELAk. Negozioa giza eskubideen errespetuaren gainetik jartzen dutela dio sindikatuak, eta ezinbestekotzat jo du Israelgo Gobernuarekiko edo enpresa israeldarrekiko harremanak ez normalizatzea.

BDZk elkarretaratzea deitu du gaur Arriagan, Bilbon, 19:30ean, Sidenorren jarduera salatzeko. Enpresaren erabakia gorabehera, mobilizazioa mantendu egin da Sidenorrek Israelera bidali behar ziren 40 altzairu loteen zamari eta kokapenari buruzko informazio guztia eskatzeko. ELAk parte hartzera animatzen du bere militantzia.