Mobilizazioak berriro esertzera behartu du Osakidetza, Uribe ESIko langileen lan baldintzak negoziatzeko

2021/11/18
Urdulizko Ospitalean ia bi urteko etengabeko mobilizazioen ondoren, eta protestak areagotzeko egindako deialdia ikusita, Osakidetza negoziazio mahaira itzuli da, 2017tik Ospitaleko plantillak jasaten duen diskriminazioa behingoz konpontzeko. Argi dago Osakidetza presionatuta eta interpelatuta sentitzeko modu bakarra mobilizazioa dela, eta orain arte eman diren urratsak horren lekuko dira. Horregatik, ELA sindikatuak mobilizazioak areagotzearen aldeko apustua egingo du, eta ez du onartuko Osakidetzak beste murrizketarik egitea langileen eskubideetan. Murrizketek eragin zuzena dute herritarrei eskaintzen zaien osasun laguntzan.

Erakunde Publikoaren eta ELA sindikatuaren arteko jarrerak oso urrun dauden arren, gutxieneko aurrerapenak daude, Osakidetzak bere plantillari ordaindu behar dizkion txandakako ordainsarien atzeraeraginezko izaeran, esaterako. ELAk eskatzen du ordainketa horien atzeraeragina 2017tik izatea, une horretan erabaki baitzen txandakako osagarria kentzea (beste zerbitzuetan egon bazegoenean), baina Osakidetzak proposatu zuen 2021eko urritik ordaintzea. Orain, aldiz, 2020ra aurreratu da Osakidetzaren proposamena. ELAren iritziz, planteamendu hori ez da nahikoa.

Negoziazioaren gainerako ataletan ez dago aurrerapausorik; beraz, ELAk honako hau eskatzen jarraituko du: alde batetik, txanda aldaketa duen langile guztiak proposamenetik kanpo ez geratzea, ezta Lehen Arretako plantillako gainontzekoak ere.