Muñoz: "Soldatak defendatuz, enplegua bermatzen dugu"

2014/01/22
Muñoz: "Soldatak defendatuz, enplegua bermatzen dugu"
ELAko ordezkari sindikalak Azpeitian izan dira gaur goizean bailara honek bizi duen egoera larria salatzeko. "Enpleguaren aldeko borrokari babesa ematera etorri gara” esanez eman dio hasera bere hitzaldiari Izarraitz pilotalekuan, Adolfo Muñoz “Txiki”, idazkari nagusiak. Ondoren manifestazioa egin dute Azpeitian bildutako bi mila ordezkari sindikalek. ELAko idazkari nagusiak Adegi “Estatuko patronalik erreakzionarioena” dela nabarmendu du eta Arantza Tapia, Eusko jaurlaritzaren industria sailburuak Adegiren proposamenari emandako babesa salatu du.

ELAko idazkari nagusiak Adegi patronalak beren boterea mugatzen duten hesi kolektibo guztiak bota nahi dituzte adierazi du. “Enpresarioaren eta langilearen arteko harremanaz hitz egiten dute bi aldeen indarrak berdinak balira bezala; baina indarrak ez daude inondik ere parekatuta. ADEGIk badaki borroka kolektiboak ekarri zituela emaitza sindikal eta sozialak, baita eskubide zibilak eta askatasun politikoak ere. Horregatik hartu nahi gaituzte banan-bana; babes kolektiboa oztopoa delako”.

Bestalde, ELAk ez duela soldaten jaitsiera babestuko, azaldu du eta honekin batera, soldata, ordainsaria baino zerbait gehiago dela azpimarratu du. “Izan ere, pentsioak ere hortik baitatoz, kotizazio bidez. soldatak ere zerga bidez biltzen diren baliabideak dira, eta bidenabar osasun publikoa, hezkuntza, gizarte-prestazioak”.