Nafarroako Gobernuak Mercadona zigortu du bi langileren duintasuna urratzeagatik

ELAk deituta, Mercadonako langileek elkarretaratzea egin dute enpresak Burlatan dituen instalazioen aurrean, Mercadonak bere langileei ematen dien tratua salatu eta lan jazarpenaren eta arrisku psikosozialen arloan esku hartze publikoa eskatzeko.

Bi langilek (horietako bat ELAko ordezkari sindikala) jarritako salaketen ondoren, Nafarroako Gobernuak 7.500 euroko zigorra ezarri dio Mercadonari, "langileen duintasuna behar bezala aintzat hartzen ez delako".

Ebazpena Lan Ikuskaritzaren ikerketa batean oinarritzen da, eta koordinatzaile batek langile horiekiko izan dituen aurkako jokabideen berri ematen du, baita enpresako arduradunek plantillako kideei egindako presioen berri ere. Jokabide horien artean, ordutegi aldaketak, ez dagozkien zereginak agintzea, komunikatzeko debekua, deskalifikazioak eta mehatxuak salatzen dira.

Ikerketan jardun duen ikuskariak egiaztatu ahal izan duenez, zentroko 18 langilerekin elkarrizketatu ondoren, enpresako koordinatzaileak eta abokatuak egindako deklarazioari buruz galdekatu zien banan-banan.

Horretan oinarrituta, kasua "behin eta berriz" eman den "langileen duintasunaren aurkako erasotzat" hartu da, "ekintza iraingarrien bidez haien erresistentzia psikologikoa txikitzeko".

Ebazpen horren aurka errekurtsoa jar dezake enpresak bide judizialean. ELAk azpimarratu nahi du zigor hau ez zela inoiz gertatuko langile hauek egoera salatzeko erabakia hartu izan ez balute. Horregatik, ELAk babesa adierazi eta dei egin nahi die antzeko praktiken biktima guztiei lan agintaritzari jakinaraz diezaioten.

Bestalde, ELAk uste du horrelako egoerak ez direla kasu isolatuak lan merkatuan, egiturazkoak baizik, eta lotura dutela kontrolik ezaren ondorioz enpresaburuek eragindako zigorgabetasunarekin. Horregatik, ELAk laneko jazarpenaren eta arrisku psikosozialen arloko esku hartze publikoa handitzea eskatzen du, eta, horretarako, ezinbestekoa da ISPLNren eta Lan Ikuskaritzaren plantillak hirukoiztea eta Europako batez besteko ratioarekin berdintzea.