Osasun-langile bat hil dela eta lanbidean jarduteko babes-neurririk ez dagoela salatzeko, kontzentrazioak IMQren aurrean

2020/04/06

IMQko langileek elkarretaratzea egin dute gaur eguerdian Bilboko Zorrotzaurre eta Andre Maria Zuriaren kliniken aurrean, lanean aritzeko aski babes neurri ez zituela eta koronabirusaren ondorioz lankide bat hil dela salatzeko. Gestlab, IMQ-Zorrozaurre, IMQ-Virgen Blanca, IMQ-Radiología eta Gizatzen enpresetako enpresa-batzordeek, hildako osasun-langilearen familiari eta IMQren kliniketan lan egiten duen Gestlab azpikontratako lankideei samina eta elkartasuna helarazi ondoren, osasun-talde horri langileen segurtasuna eta babesa bermatzeko eskatu diote.

Batzorde horiek salatu dute gaur egun prebentzio eta babes neurri indibidualizatuak ez direla nahikoak. Horregatik, premiaz IMQ Zorrozaurre eta IMQ Virgen Blanca kliniketako langile guztien osasuna eta osotasuna bermatzeko bitartekoak jartzea eskatzen dute, bai bertako langileentzat, bai azpikontratetako langileentzat (osasun-sektore, garbikuntzako zein gainerako azpikontratatuentzat).

Gogorarazi dute Osakidetzatik eratorritako COVID-19ko paziente kutsatuak artatzeko solairuak prestatu diren arren, oraindik ez zaiela testa egin langile guztiei.

Langileen ordezkariek, ondorioz, bi kliniketan lan egiten duten langile guztiei testak berehala egitea eskatzen dute, baita segurtasunez lan egiteko beharrezkoak diren ekipamendu zein prebentzio-neurriak hartzeko ere.