PFGZ-ren deflaktazioa salneurrien igoeraren erdira ere ez da iristen

2008/04/17
Mikel Noval, ELAko gizarte politikarako arduradunak aditzera eman duenez, “ Aldundiak eta Eusko Jaurlaritzak prentsari azaldu diote PFGZa eta Sozietateen Gaineko Zerga aldatzeko asmoa, inolako gizarte eztabaidarik gabe “. Horrelako jokamoldea ez da berria ELArentzat. “ Gizarte demokratiko batetan onartezina den gardentasuna eza ohikoa bilakatu da. Formalki bada ere, erakunde sindikalekin fiskalitateari buruzko egitasmoak sistematikoki ez kontsultatzea ez da ematen Europako gainontzeko herrialdeetan ”.

Bestalde, inflazioaren igoeraren eraginez presio fiskala handiagoa izan ez dadin  PFGZa deflaktatzeko ustezko akordioaren aurrean, Mikel Novalen hitzetan “ oraindik ez da ageri proposamena; dirudienez %2a jaistekotan dira. Hala balitz, 2007ko prezioen igoeraren erdira ere ez litzateke iritsiko, berau %4,2koa izan baitzen. Beraz, iruzur berri baten aurrean egongo ginateke, gizarteari eginiko beste amarru bat. Deflaktazioa % 4,2koa beharko luke eta aurreko urteko KPIari erreparatuz,  araudia automatikoki eguneratu”

 

Sozietateen Gaineko Zerga eta PFGZ aldatzeko iragarpenari buruz, ELAk  aurrerakortasun fiskalean aurrera jotzea exijitzen du. Mikel Novalek dionez “ aurrekariak ezaguturik, ez ditugu motibo asko pentsatzeko onartzeko asmoa duten aldaketa hauek norabide egokian bideratuko direnik “.

 

Horregatik, “ fiskalitateari buruzko eztabaida sakona gauzatzea ezinbestekoa da, are eta gehiago kontutan hartzen baditugu babes sozialean ditugun gabeziak , lanekoak ez diren errentetan dagoen iruzur fiskala eta errenta horiek duten  egiazko presio fiskala ”.