XVI. KONGRESU KONFEDERALA

Printzipio berberak, baina berrituta

2025/07/07
Kongresuaren lehen eguna atzoko eta gaurko zazpi militantek –Mikel Lizarralde, Elisa Rodriguez, Nerea Berrikano, Hilaria Vianeke, Cristina Ortiz de Guinea, Victor Castañares eta Andoni Valcuende– ELA izan dena, dena eta izango dena aletu zuten ekitaldiarekin amaitu zen. Ekitaldi xumea, baina balio sinboliko handikoa. ELAk 1976an Eibarren egindako III. Kongresuan onartutako printzipioak eguneratzeko baliatu nahi izan zuen XVI. Kongresua. ELAk, azken urte eta erdian, 1976an onartu zen Printzipioen Adierazpena eguneratzen egin du lan. Adierazpen hura bere garaian sindikatuaren sorrera-aktaren eta lehen estatutuen (1911) berrikuspena izan zen, gaur egun oraindik ere ELA definitzen duten funtsezko ezaugarriak ezarriz: euskal sindikatu abertzalea, sozialista, independentea eta bere afiliazioaren bidez finantzatua.

Hala ere, printzipio haiek garai hartako testuinguru historikoa islatzen zuten, bai edukian, bai hizkeran. Igaro diren ia bost hamarkadetan ELAk bilakaera sakona izan du, eta bere printzipioek eraldaketa hori islatu behar dute.

Adierazpen berri horrek aho bateko babesa jaso zuen, eta argi eta erraz laburbiltzen ditu ELAk urteetan zehar finkatu dituen balioak, helburuak eta eredu sindikala. Borroka feminista, ekologista, internazionalista eta klasekoak biltzen ditu, baita Euskal Herri burujabe eta euskaldunaren aldeko apustua ere. Epe luzerako ikuspegia proiektatzen duen eta ELAren nortasun kolektiboa eguneratzen eta indartzen duen testua da. Azken batean, printzipio berri horiek azaltzen dute zer den ELA gaur egun, zer defendatzen duen eta norantz jo nahi duen, bere nortasuna indartzeko eta bere balioak partekatzeko, bai erakundearen barruan, bai kanpoan.