San Andres paper lantegiko hitzarmenak Rajoyren erreformako zenbait neurri indargabetu du

2013/04/23
San Andres paper lantegiko hitzarmenak Rajoyren erreformako zenbait neurri indargabetu du
Urtebete eta erdian negoziazio gogorrak izan ondoren Enpresa Batzordeak (6 ELA, 2 LAB, eta 1 CCOO) I. Hitzarmena lortu dute, enpresa-mailakoa eta blindatua; hau da, aurrera-eraginak hurrengo hitzarmena sinatu arte iraunen du, enpresak ezin izango du alde bakarretik hitzarmena salbuetsi, eta ez dira beharturik egonen hitzarmena bete gabe uzteko arbitrajea nahitaez onartzera.

Horrela, Atarrabiako San Andres papelerako langileek 2011ko abenduaren gatazkan helburu ezarri zutena lortu dute: orain arteko ituna (Lan Departamentuan erregistratu gabe eta NAOn argitaratu gabe zegoen akordioa) enpresa-mailako hitzarmen bihurtzea, lege-indarra hartuko duena.

Hitzarmenaren arabera lehengo soldata- eta lan-baldintzak mantenduko dira 2012an eta 2013an, eta zenbait hobekuntza sartu da hurrengo atal hauetan: baja-osagarrietan, txanda-kontratuetan, kontratazioetan, aseguru-polizetan eta abarretan. Nabarmendu beharrekoa da egutegietako barne-malgutasunaren akordioa, zeinaren arabera enpresak ezin izanen baitu langileen lanaldiaren %10 modu irregularrean banatu.

Oraingo hitzarmenaren abiapuntua Zuzendaritzaren alde bakarreko erabaki bat izan zen. Orduan, enpresa-ituna amaitutzat jo eta egun batetik bestera Ore, Paper eta Kartoigintzako Estatu Hitzarmena aplikatu nahi zuten. Horrek zekarrena urteko soldatak 6 eta 9 mila euro bitartean jaistea zen; eta, gainera, hainbat urtetako borroka sindikalaren ondorioz lorturiko gizarte-hobekuntzak galtzea. Eta denetan garrantzizkoena dena, lan-baldintzak hemendik, enpresatik, negoziatzeko aukera ere galtzen zen.

Horren aitzinean plantillak planto egin zuen, eta mobilizazioak, lanuzteak eta 6 egunetako greba eginez lortu zuen Zuzendaritzatik lan-baldintzak mantentzea hurrengo akordioa lortu arte, enpresa-mailako hitzarmen motako akordioa. Bienbitartean gauzatu zen Negoziazio Kolektiboaren Erreforma, eta orduan konturatu ziren paper-fabrikako langileak hitzarmena baliorik gabekoa izanen zela, erreforma berritik blindatu ezean.