Europako sententzia

Ezintasun iraunkorra duten ABLEetako langileek ezin dute jaso zuzeneko langileek baino kalte ordain txikiagoa

2024/02/26
ELAk jarritako demanda bati esker, Europako justiziak ebatzi du Aldi Baterako Laneko Enpresa bateko langile batek ezintasun iraunkorra badu lan istripu baten ondorioz, jaso behar duen kalte ordaina ezin dela izan enpresak zuzenean kontratatuko langile batek jasoko lukeena baino txikiagoa. Ebazpenak, 10.500 euro beharrean, 60.000 euro baino gehiago jasotzeko aukera ematen dio langileari.

Langile horrek demanda bat jarri zuen ELArekin Ranstad Empleo S.A eta Ferrovial Servicios S.A enpresen kontra, ABLEen Estatuko Hitzarmen Kolektiboan aurreikusitako 10.500 euroko kalte ordaina jaso ondoren. ELAk uste du dagokion kalte ordaina ez dela hori, baizik eta lanean zen enpresako aplikazio hitzarmenarena araberakoa: 60.101,21 eurokoa, hain justu.

Gasteizko Lan Arloko 3 zenbakiko Epaitegiak ezetsi egin zuen demanda, eta ELAk errekurtsoa jarri zuen EAEko Auzitegi Nagusian. Azken horrek erabaki zuen auzi prejudizial bat aurkeztea Europar Batasuneko Justizia Auzitegian (EBJA), eta Europako auzitegiari galdegin dio ea erabaki hori bat zetorren Europako araudiarekin.

Bada, EBJAren epaiak adierazi du Europako Parlamentuaren eta Kontseiluaren 2008/104/EE Zuzentarauaren aurkakoa dela. Zuzentarau horrek adierazten duenez,

ABLEetako langileek zuzenean kontratatutako langileen funtsezko lan eta enplegu baldintza berdinak izan behar dituzte. Orain arte Auzitegi Gorenak ez zuen kalte ordaina “lan eta enplegu baldintza” kontzeptu barruan kokatzen. Orain, irizpide hori aldatu beharko du.

ELAk uste du epai garrantzitsua dela, aurrerapausoa baita ABLEetako langileen eskubideak enpresa erabiltzaileetako langileen eskubideekin parekatzeko.