Urriaren 13, 20 eta 27an mobilizazioak egongo dira Bizkaiko etxez etxeko laguntza zerbitzuan

2022/10/05
Urriaren 13, 20 eta 27an ELAk beste hiru mobilizazio egun deitu ditu Bizkaiko Etxez Etxeko Laguntza sektorean, patronalaren aurrean eta zerbitzuetan egingo dira kontzentrazioekin (aurrerago zehaztuko dira). Mobilizazio horiekin ELAk jarraipena emango dio pandemiaren aurretik beste sindikatuekin batera (sektorean ordezkaritza handiena duen sindikatua izan ezik) egindako aldarrikapenari. Sektoreko langileek 53 greba egun egin zituzten azken urteetan etxez etxeko laguntzaileek salatzen dituzten aldarrikapenak zaintzaren erdigunean jartzeko. Sektoreko patronal nagusiak 1,5 milioi euroko etekinak izan ditu 2018-2020 urte artean, baina % 1eko igoerak planteatzen ditu sektoreko negoziazio mahaian.

ELAk, mobilizazio hauekin, langileek salatuko dute sei urte baino gehiago daudela langileak hitzarmenik gabe. Horretaz gain, gogora dezagun administrazioek diru publikoarekin ordaintzen dituztela azpikontratatutako eta etekinak dituzten enpresa horiek.

ELAren ustez, honako gai hauek oinarrizko aldarrikapenak dira lan baldintzak eta zerbitzuen kalitatea hobetzeko: erosteko ahalmena berreskuratzea, enpleguaren egonkortasuna (lanaldi osoko kontratuak eta mugagabeak...), bateragarritasuna hobetzea (lizentziak, zerbitzuak elkartzea...) eta zerbitzu orduak areagotzea, gutxienez lan egindako ordu bat zenbatuz, iraupena edozein dela ere.
ELArentzako onartezina da udal askok emandako zerbitzuak murriztea, denbora partzialeko lanaldien gehikuntzarekin permisiboak izatea edo lizitazio publiko desberdinetan prezio baxuena kalitatea baino inportanteagoa izatea. Eta are larriagoa dena, sektoreko patronal nagusiak 2018. eta 2020. urteen artean 1.5 milioi euroko etekina lortu ondoren, % 3ko soldata igoera eskaintzea erosahalmenaren galera %11.20koa denean.
Horregatik guztiagatik, ELAk dei egiten die sektoreko langile guztiei zainketa zerbitzua errotik alda dezatela eskatzeko, herritarren kalitateko gizarte zerbitzuen alde egin dezaten eta langileen lan eta osasun baldintzak hobetu ditzaten.