Langile bat hil da Urnietako Polikiroldegiko berritze lanetan

2021/10/15
Gaur lan-istripu hilgarri bat gertatu da Urnietako Polikiroldegiko berritze lanetan; hain zuzen, Miguel Imaz enpresa ari zen berritze lan hauek egiten Urnietako Udalak esleituta eta zendu den langileak Pavimentos Tecnológicos Zarra enpresarentzat egiten zuen lan. Antza denez, hormigoia botatzeko lanetan ari ziren obran eta ikertzeke dauden arrazoiak medio, kamioiaren besoetako batek ekilibrioa galdu eta luma mugitu du, honek zendutako 59 urteko langilea kolpatu eta heriotza eragin diolarik. Heriotza berri horrekin, dagoeneko 51 pertsona zendu dira gutxienez 2021ean Euskal Herrian lanean, hamargarrena Gipuzkoan.

Hildakoaren senitarteko eta lagunei elkartasun eta babes zintzoena adierazteaz harago, egun sektore honetako langileek jasaten duten prekarietate egoera salatu nahi du ELAk. Administrazio Publikoak esleitutako lanetan gertatzen den amaigabeko azpikontratazio sareak prekarietate honen adibide garbia dira, are gehiago eraikuntza sektoreko lanen kasuan.
Etengabeko lege-urratzeak bai lan eta baita prebentzio legedian, lan-baldintza ezin gogorragoei eta lan hauetan jasaten duten presioari gehituta, ezbeharrak gertatzeko koktel perfektu bilakatzen dira, kasu honetan gertatu den moduan.
Honi gainera Administrazioaren sektorearekiko erabateko utzikeria konszientea gehitu behar diogu.

Ohiko elkarretaratzea asteartean, hilak 19, 13:00tan, Urnietako Plazan, izango da.