2017an egin diren kontratu guztien % 92,9 behin-behinekoa izan da

2018/01/03
Enplegu Zerbitzu Publikoak argitaratutako datuen arabera, 2017an egin diren 10 kontratutik 9 behin-behinekoak izan dira Euskal Herrian, eta hauen erdia baino gehiago hilabete bat baino laburragoa. Bestalde, 100.000 pertsona baino gehiago daude langabezian izena emanda eta inolako langabezia saririk jaso gabe.

Enplegu Zerbitzu Publikoak gaur argitaratutako datuek aditzera ematen dutenez, Hego Euskal Herrian 163.279 pertsona daude langabezian izena emanda. Hauetatik 91.077 emakumeak dira, %55,8a. Bilakaerak erakusten du langabezia azken hilabetean 235 pertsonatan jaitsi dela, eta 12.939 lagunetan 2017an zehar.

Hala ere, langabezia maila onartezina da. 163.279 langabetu daude Hego Euskal Herrian, eta langabezia tasa % 12,2koa da, 28-EBekoa baino 4,8 puntu altuagoa (% 7,4koa da). Soilik espainiar Estatutak eta Greziak dute langabezia tasa altuagoa.

Langabezian daudenen egoera latza da. Langabetuen %61,3ak ez du inolako langabezia saririk jasotzen (100.279 pertsonek). Eta kotizaziopeko langabezia saria % 22,5ak baino ez du jasotzen.

Prekarietatea gero eta larriagoa da. Enplegu berri bat edo kontratu berri bat dutenen egoera ere gero eta okerragoa da: 2017an egin diren kontratu guztien % 92,9 behin-behinekoa izan da, eta azarora arte egin diren behin-behineko kontratuen % 50,6 hilabete bat baino denbora gutxiagorako egin da (obra edo zerbitzu, bitartekotasun kontratuak eta produkzioaren egoeragatik egindakoak kontuan hartuta).