DSBEren aurreproiektuak murrizketak finkatu ditu eta atzerapauso gehiago sartu ditu 2008ko Legearekin alderatuta
Eusko Jaurlaritzako Enplegu eta Lan Sailak (PSEk gidatzen duena), Dirusarrak Bermatzeko Errenta (DSBE) erreformatzeko aurreproiektua aurkeztu du, eta orain Eusko Jaurlaritzan eztabaidatu beharko dute, Legebiltzarreko tramitea hasi aurretik. Hasteko, proposamen honek dagoeneko indarrean dauden murrizketak sendotzen ditu eta 2008an Eusko Legebiltzarrean onartu zen Legearekin alderatuta atzerapauso gehiago ematen ditu. Hau da, DSBE prestazioek orain dela 13 urte baino beherago jarraituko dute. Gaineratu behar da aurreproiektu honek ez duela jasotzen Euskal Herriko Eskubide Sozialen Gutunak (51.000 sinadurek bermatua) bultzatutako ILPn erreklamatutako alderdietako bat bera ere, eta haren eztabaida atzera bota zela Legebiltzarreko izapidean.
18/2008 Legeak LGSarekiko zenbatekoak ezarri zituen ( % 88 bakarrik dauden pertsonentzat, % 113 bi pertsonako unitateentzat eta % 125 hirurentzat; eta % 100 pentsiodunentzat). Lege hori gaur aplikatuko balitz, pertsona baten diru-sarrerak 975 eurokoak izango lirateke (hamabi hilekotan). Pentsiodunen kasuan, diru-sarrerak bermatzeko errenta 1.108 eurokoa izango litzateke. Eusko Jaurlaritza murrizketak egiten ari da 2012tik. Hala, 2021ean, DSBE 706 eurokoa zen hilean pertsona bakar batentzat (2008ko Legearekin alderatuta, 249 euro gutxiago), eta 810 eurokoa pentsiodun batentzat (292 euro gutxiago). Aurreproiektu berriarekin, DSBE arrunta berdin geratuko litzateke (705 euro gaur egun, eta 706 euro gaur egun), pentsiodunek gora eginda (egungo 810 eurotik 893 eurora igaroko lirateke). Nolanahi ere, zenbatekoak 2008ko Legeari dagozkionak baino askoz txikiagoak dira.
Gainera, aurreproiektuak diru-sarrerak bermatzeko errenta jasotzeko gutxieneko adina 23 urtetan mantentzen du, eta gutxieneko 2 urte erroldatzea proposatzen du adingabeak badaude (3 urte gainerako kasuetan); horrek esan nahi du murrizketa bat dagoela 2008. urtearekin alderatuta (urtebete batekoa zen orduan). Gainera, Etxebizitzako Gastuetarako Prestazio Osagarria (EPO) desagertzen da, eta, oro har, hartzaileen kontrola eta kriminalizazioa mantentzen da (berriz ere teknika biometrikoen eta adimen artifizialaren bidez), bai eta Lanbideko ikuskatzaileen jarduna ere, agintaritzaren agente gisa.