Lanbidearteko Gutxieneko Soldata
Estatuan adostutako igoerak ez die erantzuten Hego Euskal Herriko langileen premiei
Espainiako Gobernuak Lanbidearteko Gutxieneko Soldatan onartutako %5eko igoerak hilean 1.134 eurora handitu du. Zenbateko hori ez da nahikoa, ordea, Hego Euskal Herrian modu duinean bizitzeko, are gutxiago etxebizitzaren, alokairuaren eta elikagaien prezioak urteotan LGSaren igoeraren gainetik handitu direnean. Hala uste du ELAk. Horregatik, azken urteotan aldarrikatu du gutxienez 1.400 euroko gutxieneko soldata. Gainera, sindikatuak gogora ekarri du enpresek mozkin oso handiak izan dituztela pandemiaren osteko urteetan, eta mozkin horiek langile klasea pobretzearen kontura lortu dituztela.
Era berean, kontuan izan behar da gutxieneko soldata jasotzen duten langileen %40 inguru etxeko langileak direla, ia guztiak emakumeak. Gutxieneko soldata hemendik aurrera Espainiako batez besteko soldataren %60rekin mugatzeak ekarriko du emakume horiek pairatzen duten soldata arrakala betikotzea, eta oro har, Lanbidearteko Gutxieneko Soldata jasotzen duten langileak pobreziara kondenatzea.
Gauzak horrela, ELAk exijitzen du gutxieneko soldata lurralde bakoitzaren egoeraren arabera ezar dadila. Besteak beste, gutxieneko soldata aplikatzen zaien langileek Hego Euskal Herrian bizitzeko moduko soldata behar dutelako.