enplegua

2023an baino pertsona gehiago daude langabezian

2024/07/02
Hego Euskal Herrian 822 langabe gutxiago erregistratu ziren ekainean. Hala ere, ez dira datu positiboak, jaitsiera aurreko urteetakoa baino askoz txikiagoa izan baita. Urte arteko tasak adierazten du duela urtebete baino okerrago gaudela; zehazki, iazko ekainean 735 langabe gutxiago zeuden.

Lurraldeka, Nafarroan 767 langabe gutxiago izan ziren, eta EAEn 55 gutxiago. Emakumeei dagokienez, aurreko hilean baino 121 langabe gehiago zeuden. Hala, emakume langabeen ehunekoak gora egin zuen berriz ere, eta %58,8ra iritsi zen. Bestalde, gazteen langabeziak ia ez zuen hobera egin; gainera, gazte langabeen kopuruak 2019an baino handiagoa izaten jarraitzen du.

Hego Euskal Herriaren langabezia-tasak Europako batez bestekoaren oso gainetik jarraitzen du; Hego Euskal Herrian tasa % 9,6koa da, eta Europar Batasuneko batez bestekoa, berriz, % 6koa.

Kontratazioari dagokionez, kontratuen behin-behinekotasun-tasak okerrera egin zuen berriro, aurreko hilabeteetako kopuruekin alderatuta, eta lan-erreforma onartu zenetik izandako erregistrorik txarrenetakoa izan zen. Espainiako ministerioak emandako datuen arabera, sinatutako kontratuen %78,6 aldi baterakoak izan ziren. Aipatzekoa da Estatuan, Nafarroan eta EAEn izan zela aldi baterako kontratuen tasarik altuena, alde handiarekin gainera; Estatuan, aldi baterako kontratuen tasa 22 puntu beherago egon zen, zehazki, %56an.

Ekaineko datuek langabeziaren geldialdia erakusten dute, hala adierazten baitu urte arteko adierazleak. Gainera, enpleguaren kalitateak ez du ona izaten jarraitzen, behin-behinekotasunaren gorakadak erakusten duen bezala; ekainean, bost kontratutik ia lau behin-behinekoak izan ziren.