LANGABEZIA MANTENTZEN DA

Langabezian dauden pertsonen erdiek ez dute inolako prestaziorik edo langabezia subsidiorik jasotzen

2023/03/02
Enplegu Zerbitzu Publikoaren datuek erakusten dutenez, Hego Euskal Herrian langabeen kopurua mantendu egin da azken hilabetean, 144.660 pertsona daude langabezian izena emanda (112.296 EAEn eta 32.364 Nafarroan). Gogoratu behar da otsaila langabezia murriztu ohi den hilabetea izaten dela. Gainera, nabarmendu behar da Nafarroan 6 hilabetez jarraian langabeziak gora egin duela. Langabezia tasa % 10,6koa da Hego Euskal Herrian, EBko batez besteko % 6,1etik urrun.

Langabezian dauden pertsonen babesgabetasun eta prekarietate egoera oso kezkagarria da. Langabezian izena emanda dauden pertsonen % 52k ez du langabezia prestaziorik edo subsidiorik kobratzen. 3tik 1ek baino gutxiagok ( % 28) jaso dute kotizaziopeko prestazioa (993 euro batez beste EAEn eta 1.023 euro batez beste Nafarroan), eta gainerakoek 480 euroko subsidioa kobratu dute hilean.
Kontratazioaren datuei dagokienez, sinatutako kontratuen %73,6 aldi baterakoak izan dira, hau da, otsailean sinatutako lau kontratutik hiru aldi baterakoak izan dira.

Datu hauek kontratazio berrietan dagoen prekarietatea eta enplegurik gabeko jendearen babesgabetasuna erakusten dute. Ziurgabetasun egoeran gaude, eta prezioek eta etxebizitzak, besteak beste, gora egiten jarraitzen dute. Beharrezkoa da antolaketa eta mobilizazioa bizi baldintzen hobekuntzaren alde borrokatzeko.