ELAk lau greba egun deitu ditu hitzarmenaren negoziazioaren blokeoa salatzeko

Hotel Occidental Bilbaoko (Barceló Hotel and Ressort taldea) plantilla osatzen duten 50 bat langileen soldata baxuak eta baldintza eskasak direla eta, enpresa batzordeak (ELAk bost ordezkari ditu) lau greba egun deitu ditu (ekainaren 27, 28, 29 eta 30ean), hitzarmenaren negoziazioan enpresaren blokeoa salatzeko. Hotelaren aurrean ere kontzentrazioak egingo dira ekainaren 23, 24 eta 25ean, greba baino lehen. 2019an plantilla nabarmen murriztu zenetik, lan kargak nabarmen handitu dira. “Enpresak irabazi handiak lortu ditu langileen osasunaren kontura”, dio ELAk. Gauzak horrela, eskaera zehatzak egin dizkiote enpresari: KPIa bermatuko duten soldata igoerak; lan kargak murriztea; ia sistematikoki egiten diren aparteko orduak erabat kontrolatzea eta ordaintzea; eta aldizkako kontratu finkoak mugagabe bihurtzea eta kontratu partzial lanaldi oso bihurtzea.