Eusko Jaurlaritzak Deustuko Etengabeko Arreta Gunea funtsezko zerbitzua dela dio orain, greban % 100eko gutxieneko zerbitzuak ezartzeko

2021/03/17

Osakidetzak Deustuko (Bilbo) Etengabeko Arreta Gunearen (EAG) aurrez aurreko zerbitzua ixteko erabilitako argudioaren aurka, hau da, ez zela herritarrentzako ezinbesteko zerbitzua, orain Eusko Jaurlaritzak dio badela funtsezko zerbitzua, beti ere, SATSE, ELA, LAB, CCOO, UGT eta Esk sindikatuek martxoaren 18rako deitutako greban % 100eko gutxieneko zerbitzuak ezarri ahal izateko. Osakidetzak erabaki zuen 00:00etatik 08:00ak arte itxiko zela, eta pazienteak Basurtuko Ospitalera bideratuko zirela.

SATSE, ELA, LAB, CCOO, UGT eta Esk sindikatuek martxoaren 18rako Deustuko NUPen (Bilbo) deitu duten greba egunerako % 100eko gutxieneko zerbitzuak ezarri ditu Eusko Jaurlaritzak, bere aurreko irizpidearekin kontraesanean. Izan ere, Deustuko NUPen gaueko arreta presentziala kentzea erabaki zuen Osakidetzak, hain zuzen, zerbitzu hori funtsezkoa ez zela argudiatuta. Bada, orain, grebaren atarian, Eusko Jaurlaritzak guztiz kontrako argudioa erabili du gehiegizko gutxieneko zerbitzuak ezartzeko (% 100). "Grebarako eskubide legitimoa ezabatzek asmoz, Lan Sailak kontrako argudioa erabili du, hau da, badela funtsezko zerbitzua eta, hortaz, gutxieneko zerbitzuak ezarri behar direla greban. Urteko gau guztietarako balio duenak ez du, antza, greba egun baterako balio", salatu dute sindikatuek.

Gaineratu dutenez, aginduan akats bat badago: Deustuko EAGko zerbitzua aurrez aurreko modalitatean ematen dela dio, 24 orduz bertaratzen diren pazienteentzat, baina, egia esan, 2021eko otsailaren 1etik aurrera, laguntza-modalitate hori jada ez da ematen 00:00etatik 08:00etara.

Sindikatuek Osakidetzari eskatu diote atzera bota dezala Deustuko NUPen aplikatutako murrizketa, eta aurreko ordutegia eta zerbitzua berreskuratzea, pandemia betean herritarrei eskaintzeari utzi baitio. Beste behin ere, oinarrizko zerbitzuetan murrizketak egiteko politikak egiten direla salatu dute.