Mobilizazioak gogortuko dituzte enpresak entzungor egin diolako hitzarmen berritzeari

BOSeko (Bilboko Orkestra Sinfonikoa) langileek mobilizazioekin jarraituko dute aste honetan: apirilaren 3an eta 4an abonu kontzertua baino lehen egingo dute, eta apirilaren 5ean, 12:00etan, Arriaga Antzokiaren aurrean, elkarretaratze musikatua egingo dute. Hilabete luzez hitzarmena berritzeko negoziatzen aritu ondoren, zuzendaritzak entzungor egin die aldarrikapenei, eta langileek mobilizazioen egutegia gogortzea erabaki dute.

Plantilla 88 langile inguruk osatzen dute, eta gehienak musikariak dira. Aldarrikapen nagusiak lan osasunera eta orkestra behar bezala dimentsionatuta egotera bideratuta daude. Zehazki, azken urteetan galdutako 10 lanpostu berreskuratzea eta musikarien ordezkapen egokia bermatuko duen araudia onartzea eskatzen dute. Horrela, bajen eta beste arrazoi batzuen ondorioz sortzen diren gabeziak betetzeko aukera gehiago emango lituzke, eta, aldi berean, orkestraren kalitate artistikoa eta, batez ere, langileen osasuna babestuko lirateke.

Enpresa batzordearen ordezkaritzan, ELAk eta CCOOk ordezkari bana dute, eta UGTk bi.