Mobilizazioak Metro Bilbaon, lan baldintzak okertu direla salatzeko

2022/06/22
ELAk, CIMek eta UGTk kontzentrazioa egin dute Bilbon, Bizkaiko Foru Aldundiaren aurrean, Metro Bilbaoko murrizketak salatzeko; besteak beste, langileek erosteko ahalmena galdu dute eta enpresak ez ditu ordutegi eta txandak aldez aurretik zehazten, langileen kontziliazioaren kaltetan. Sindikatuek salatu dute enpresak blokeatuta dituela negoziazioak, beti ere, langileen arteko talka sortzeko asmoz. Gauzak horrela, Metro Bilbaori, Garraio Partzuergoari eta Bizkaiko Foru Aldundiari eskatu diete murrizketa politika bertan behera uztea eta behingoz heltzea langileek eskatutako hobekuntzei.

Gogorarazi dute duela gutxi Euskotrenen eta Bizkaibuseko emakidadunen batean akordioa lortu dela. “Akordio horiek arazoak konpondu dituzte, baina Metro Bilbaoko zuzendaritzak ez du halako akordiorik sinatu nahi”, kexu dira.

Langileek hamarkada bat daramate erosteko ahalmena galtzen eta beren lan baldintzak murrizten. Besteak beste, Metro Bilbaok elementu erregresiboak ezarri nahi dizkie behin-behineko langileei; ez du koefiziente murriztailearen galera konpentsatu nahi, plantillaren zati bat beranduago erretiratzera behartuz; lan egutegiak malguak dira eta langileei azken momentuan jakinarazten zaie zeintzuk izango diren euren lan txandak, kontziliazioaren kaltetan; langileei funtzioak berriak inposatu dizkiete, alde bakarrez; eta bezeroarentzako arreta okertu dute -gero eta ikuskatzaile gutxiago dago erabiltzaileak laguntzeko-, beti ere, herritarrei eskaintzen zaien zerbitzuaren kaltetan.