Euskal Herria lurralde baketsu eta desmilitarizatua izatea eskatu dute
2026/05/28 Bilbo
Euskal Herriko Eskubide Sozialen Kartak, beste hainbat eragilerekin batera, giza katea egin dute, Bilbon, `Gerrari Ez, Bizitza Duinak Denontzat´ lelopean. Su Txikien Itsasoaren dinamikaren baitan, Bizikidetza Plazatik abiatu dira eta Arriagaraino joan dira hiriburuko zubi desberdinak zeharkatuta, “zubirik zubi gerraren kontra”. Euskal Herria lurralde baketsu eta desmilitarizatua izatea, EAEko eta Nafarroako parlamentuan neutraltasun estatutuak aprobatzea, gerrarekin negoziorik ez egitea, eta aitzitik, diru publikoarekin langile klasea erdigunean jarriko duen trantsizio ekosoziala bultzatzea aldarrikatu dute. Izan ere, baliabide publikoak bizitza duinak eta eskubide sozialak bermatzeko bideratu behar direla defendatu dute.
Datozen egunetan mobilizazioak egongo dira Gasteiz eta iruñean aldarrikapen berberak erdigunean jartzeko.