145 egun greban daramatzate Donostiako Tabakalerako liburutegiko langileek

2019/05/15
"Noizko gure agintariek hainbestetan aipatzen dituzten lan baldintza duinak Donostiako Tabakalerako Ubik mediatekan? Nik hemen larunbat eta igandetan ere lan eginda hile bukaeran 900 euroko soldata daukaten langileak ikusten ditut". Hala eman dio hasiera ELAko idazkari nagusi Mitxel Lakuntzak 145 eguneko greba langa gainditu berri duten Ubikeko langileei elkartasuna adierazteko Donostian egindako agerraldiari. Lakuntzak Eusko Jaurlaritza, Gipuzkoako Aldundia eta Donostiako Udalaren jarrera ere gogor salatu ditu, beste alde batera begiratzea leporatuz.

Donostiako Udalaren jarrerarekin agertu da bereziki haserre. “ELA bileretan izatea galarazi digute, eta hori onartezina da”, azpimarratu du. Kultura alorrean lanean ari diren langileekiko begirunea aldarrikatu Lakuntzak. “Ekitaldi handietara begira daude. Ez zaie axola langileak prekarietatean murgilduta egotea, soldata eskasekin bizi behar izatea”.

Tabakalerako Ubik mediatekak bost hilabete daramatza itxita. Egun guzti hauetan, zazpi bilera baino ez dituzte izan langileek enpresarekin. Tabakalerak, gainera, ez du bilera bakar batean ere parte hartu; are larriagoa dena, ez da langileen eskakizun minimoetara gerturatzen den proposamenik jarri mahai gainean. Jarrera honek, inoiz baino gehiago, zalantzan jartzen du enpresak eta Tabakalerak gatazka honekin amaitzeko duten nahia.