ELA-Ertzaintzak Segurtasun Sailari eskatu dio bere gain hartu dezala Gipuzkoako ertzain-etxeetako garbitzaileen gatazkan duen ardura

2019/01/23

Gipuzkoako ertzain-etxeetako 50etik gora langileek greba egin dute joan den irailetik hona, Gipuzkoako kale-garbitzaileekin alderatuta -gehienbat gizonezkoak- duten soldata-arrakala ezabatzeko asmoz. Hilabete horietan guztietan Segurtasun Sailak erabateko utzikeriaz jokatu du, beste aldera begiratuz. Eta hori, gure iritziz, oso larria da, funtsezko alderdi bat bazter batera utzi baitu, alegia, gure lankideen eguneroko lana ezinbestekoa da ertzain-etxeetako ohiko jarduna behar bezalakoa izan dadin.

Beraz, Segurtasun Sailak erantzukizunez ez jokatzean, eta lan-gatazka horretan zuzenean parte ez hartzean, dagozkion eginkizunak eta eginbeharrak ez-betetze oso larria izateaz gain, ertzainen osasuna arriskuan jarri du (infekzio-sorguneak, alergiak...), eta baita Gipuzkoako ertzain-etxeetara egunero joaten diren herritarren osasuna ere.

Zerbitzuaren emakida urrian bukatu zen; beraz, Sailak lizitazio berria egingo duenean aparteko aukera izango du emakume garbitzaileen soldata-arrakala berdintzeko. Kontratazio publikoaren arloko azken legeek -bai estatuko legeak, bai Europako zuzentarauak- gizonen eta emakumeen arteko benetako berdintasuna sustatzea eta diskriminazio-mota guztiak ezabatzea bultzatzen dute. Justizia sozialeko kontua da, eta bada garaia gainditu gabeko gai horri heltzeko.

Horiek horrela, ELA-Ertzaintzak eskatzen dio Estefania Beltran de Herediaren ardurapeko Segurtasun Sailari garbikuntza-zerbitzuko gure lankideen diskriminaziozko egoerari amaiera emateko, eta lan-gatazka hori behingoz onbideratzeko.

Bestela, ELA-Ertzaintzak mobilizazioak sustatuko ditu laster batean gure lankide grebalarien alde.