ELAk Donostiako TAOko langileen lan baldintza kaskarrak salatu ditu

2022ko azaroan, probintziako hitzarmenaren negoziazioa enkistatu ondoren, TAOko langileek protestak hasi zituzten, eta 29 eguneko greba egin zuten. Udalarekin hainbat harreman izan ondoren, greba gelditzea erabaki zen, negoziatzeko borondate ekintza gisa. Helburua zen patronalak fede onez negoziatzea, orain arte proposatutako soldata-igoerak iseka baitziren langileentzat (erosteko ahalmenaren % 10eko galera zekarten). Patronalak ildo horretan jarraitu zuen; proposamen bakarrak langileak pobreago bihurtzea ziren, negoziatzeko inolako interesik gabe.

Bi urte eta erdi baino gehiago hitzarmenik gabe eta 18 bilera baino gehiago egin ondoren, eta erosteko ahalmenaren galera handiaren ondoren, ELAk EYSA enpresari, kontrataren esleipendunari, deitu zion OTA-Donostiaren hitzarmen propio bat negoziatzen hasteko, baina hori ere baztertu egin da. Enpresak ez du OTA-Donostiaren hitzarmen bat negoziatu nahi, eta patronalak ez du probintziako hitzarmen bat negoziatu nahi. Bitartean, Udalak, kontrata esleitzeaz arduratzen denak, beste alde batera begiratzen du.

Plantillaren egungo baldintzek, 9 orduko lanaldiekin, familia kontziliazioa eragozten dute. Ez hori bakarrik. Langile horiek, probintziako gainerako lekuetan baino ordu gehiago lan egiteaz gain, gutxiago kobratzen dute. Eta hori guztia, nahiz eta Donostia izan TAO garestiena duen hiriburua, urtez urte garestitzen diren prezioekin. Azkenaldian hitzarmenak sinatu dira Zarautzen eta Tolosan, erosteko ahalmena eta astean 35 orduko lanaldiak bermatzeko.

Bien bitartean, enpresa esleipendunak, Udalaren oniritziarekin, ez ditu bajak eta lanaldi-erdiak ordezkatzen. Eta hori gutxi balitz, maiatzaren 1etik aurrera TAO zerbitzua handitu egingo da Loiolan eta Aieteko hainbat eremutan, herritarrentzako 5,8 milioiko kostuarekin. Hori guztia Udalak, patronalak eta enpresa esleipendunak poltsikoak bete ditzaten, Donostiako TAOko langileei probintzia osoko baldintzarik txarrenak mantenduz.

ELAk salatu du Udalak beste alde batera begiratzen duela, azpikontratatutako langileen lan-baldintzak ez zaizkiola axola, probintzia osoko lan-baldintza txarrenak dituen plantilla noraezean uzten duela... Familia-kontziliaziorik gabeko langileak, egunean 9 orduko lanaldiekin eta hilaren amaierara iristea ahalbidetzen ez duten soldatekin lurraldeko hiririk garestienean.