DONOSTIAKO SOROSLEAK
ELAk salaketa aurkeztu du epaitegian ordezkari sindikal bat kaleratzeagatik
ELAk salaketa jarri du epaitegian NEO enpresak sorosle bat kaleratzeagatik. Sorosle hori Gipuzkoako hondartzetako sorospen zerbitzuaren ordezkari sindikala da. Kaleratzea ekainaren 26an egin zen, sorosleak material faltagatik zerbitzua segurtasunez emateko baliabiderik ez zegoela publikoki salatu eta gutxira; enpresak "zuzendaritzari desobedientzia" egin ziola argudiatu du.
ELAk epaitegietara jo du enpresaren aldetik errepresalia eta isilarazteko saiakera bat dagoela iritzita, zerbitzuaren antolaketan gabezia larriak daudela salatzeagatik, pertsonen bizitzaren segurtasunean zuzeneko inplikazioak izanda.
ELAren ustez, adierazpen askatasunaren eta ekintza sindikalaren aurkako erasoa da, eta kaleratutako langilea berehala berriz onartzea eskatzen du. Gainera, sektoreak lehen hitzarmen kolektibo probintziala lortu eta hilabete batzuetara gertatu da egoera hori. Lorpen hori urteetako borroka sindikalaren ondorio izan da.
ELAk sektorea profesionalizatzeko eta erregularizatzeko borrokan jarraituko du, lan baldintza eta beharrezko material egokiekin.