Langileek greba deitu dute zentroaren itxieraren aurka

ELAk greba deitu du Donostiako La Anunciata ikastetxean otsailaren 24, 25 eta 26rako, 2025-2026 ikasturtearen amaierarako iragarritako zentroaren itxiera salatzeko. Aurreikuspenen arabera, datozen egunetan 29 langileen kaleratze kolektiboaren (EEE) prozesua hasiko da. Gaur manifestaziora deitu dute familia eta auzoko eragile eta auzokideen babesa izateko, arratsaldeko 17etan hasiko da ikastetxe parean.

Ikastetxearen titulartasunak, Francisco Coll Fundazioak, urtarrilaren 29an jakinarazi zuen jarduera etetea erabaki zuela, ia 90 urtez funtzionamenduan egon ondoren. ELAk salatu du ez zela aldez aurretik negoziatu ordezkaritza sindikalarekin, eta langileek azaldu dute egun horretan bertan izan zutela horren berri. Gainera, matrikulazio-aldia hasi baino lehen hartu zen erabakia, eta horrek ikasleen jarraipena baldintzatzen duela adierazi du sindikatuak.

ELAk erantzukizunak eskatu dizkie Kristau Eskola patronalari eta Eusko Jaurlaritzako Hezkuntza Sailari, itunpeko ikastetxea delako:

“Azken ikasturteetan hainbat itxiera eta fusio prozesu ematen ari dira hezkuntza publikoan eta itundutako hezkuntzan. Prozesu horiek guztiak lanpostuei eta langileen interesei erreparatu gabe gauzatzen ari dira”, adierazi du Mikel Uranga ELAko bozeramaileak.